რუსეთში სასულიერო პირებს, რომლებიც არ დაემორჩილებიან კორონავირუსის გავრცელების შეზღუდვისთვის დაწესებულ მითითებებს, პასუხისმგებლობა დაეკისრებათ. მათ შორის არის საეკლესიო სასამართლოზე წარდგენა. ამის შესახებ საუბარია მოსკოვის პატრიარქ კირილის განკარგულებაში, რომელიც მან გუშინ, 27 აპრილს გამოსცა.

"იმ შემთხვევებში, როცა ამ ბრძანებებისა და მითითებების შეუსრულებლობა გამოიწვევს ადამიანის ინფიცირებას კორონავირუსული ინფექციით და ამას გარდაცვალება მოჰყვება, დამნაშავე შეიძლება წარსდგეს საეკლესიო სასამართლოს წინაშე. სხვა შემთხვევებში კი, მას დაეკისრება საეკლესიო-ადმინისტრაციული პასუხისმგებლობა სასიკვდილო დაავადების მასობრივი გავრცელების აცილებისთვის არსებული ზომების გაუთვალისწინებლობის გამო", — აღნიშნულია კირილის განკარგულებაში.

დოკუმენტში სასულიერო პირებს ახსენებენ მითითების დაცვის პირადი პასუხისმგებლობის შესახებაც.

რუსეთის პატრიარქმა მორწმუნეებს ეკლესიებში მისვლისგან თავის შეკავებისკენ მარტის ბოლოს მოუწოდა. აღდგომამდე რამდენიმე დღით ადრე კი გაავრცელეს წერილი, რომლის მიხედვით, ქალაქ მოსკოვისა და მოსკოვის ოლქის ეკლესიებში სააღდგომო ღვთისმსახურება მრევლის გარეშე ჩატარდა.

ოფიციალური მონაცემებით, რუსეთში ამ დროისთვის კორონავირუსის 87,147 შემთხვევაა დაფიქსირებული. ამ რაოდენობით რუსეთმა უკვე გაუსწრო ჩინეთს, სადაც ვირუსი პირველად დაფიქსირდა. ამასთან, ქვეყანაში კორონავირუსის გამო დაიღუპა 794 ადამიანი.