საგარეო საქმეთა მინისტრის მოადგილის, ალექსანდრე ხვთისიაშვილის განცხადებით, სამხრეთ კორეიდან 50 000 PCR, ანუ ე.წ. ოქროს სტანდარტის ტესტი შეიძინეს, რომელიც საქართველოში მაისის დასაწყისში ჩამოვა. მანვე აღნიშნა, რომ შემდეგი კვირის დასაწყისში ელოდებიან ტესტებს, გერმანიიდან, ჩინეთიდან და პოლონეთიდან, თუმცა არ დაუკონკრეტებია რომელი ტიპის ტესტზეა საუბარი.

საგარეო საქმეთა სამინისტროს ინფორმაციით, სამხრეთ კორეული კომპანია SD Biosensor, Inc. აპრილის ბოლოს საქართველოში კოვიდ 19-ის ანტიგენის აღმოჩენის ტესტების ექსპორტს განახორციელებს. მათივე თქმით, ტესტები ჯანდაცვის სამინისტროს გადაეცემა.

ბოლო რამდენიმე დღეს ტესტებისა და მასობრივი დიაგნოსტიკის საკითხი ისევ აქტუალური გახდა. მას შემდეგ, რაც ინფექციური საავადმყოფოს დირექტორმა, მარინა ეზუგბაიამ განაცხადა, რომ შემთხვევათა რიცხვის ზრდა აგრესიული ტესტირების შედეგი იყო, ოპოზიციამ მოითხოვა, რომ ტესტირება მასობრივად ჩატარდეს, რაც ინფიცირებულთა გამოვლენის საშუალება იქნება.

დაავადებათა კონტროლის ცენტრის დირექტორის მოადგილემ, პაატა იმნაძემ ამ თემაზე საუბრისას განაცხადა, რომ ტესტირების საჭიროებას ამ საკითხზე მომუშავე გუნდი გადაწყვეტდა და მათ მიერ აქამდე შერჩეული ტესტირების სტრატეგია შედეგიანი იყო, რის დასამტკიცებლადაც, მან ინფიცირებულთა და გარდაცვლილთა სტატისტიკა მოიშველია.

გაიგეთ მეტი: