თეთრიწყაროს მუნიციპალიტეტში კორონავირუსი მერიის თანამშრომელს დაუდგინდა. ამის შესახებ საზოგაოდებრივ მაუწყებელს ქვემო ქართლის რწმუნებულმა, შოთა რეხვიაშვილმა განუცხადა.

მისივე თქმით, მერიის თანამშრომლის მჭიდრო კავშირები გუშინვე შეისწავლეს.

"თეთრიწყაროს მუნიციპალიტეტში ინფექციის გავრცელების ერთი დადასტურებული ფაქტი დაგვემატა და ეს არის მერიის თანამშრომელი. გუშინვე, მერიის ამ თანამშრომლის მჭიდრო კავშირები იქნა შესწავლილი და მერიის სხვა თანამშრომლებთან ყველასთან მოსულია უარყოფითი შედეგი, დადასტურება არ არის", — განაცხადა რეხვიაშვილმა.

თეთრიწყაროს მუნიციპალიტეტის რაიონულ ცენტრში, თეთრიწყაროში მკაცრი საკარანტინო შეზღუდვები 26 აპრილს ამოქმედდა. მიზეზად უწყებათაშორისი საკოორდინაციო საბჭო მაღალ ეპიდემიოლოგიურ რისკს ასახელებს.

ასევე, არსებული ინფორმაციით, თეთრიწყაროს მუნიციპალიტეტში სამედიცინო სფეროს წარმომადგენელს კორონავირუსი დაუდასტურდა. გარდა ამისა, დაფიქსირდა ინფიცირების სხვა შემთხვევებიც.

ბოლო მონაცემებით, საქართველოში კორონავირუსით ინფიცირებულია 485 ადამიანი, მათგან 136 გამოჯანმრთელებულია, ხოლო 6 გარდაცვლილი. კარანტინის რეჟიმში 4 928 ადამიანი იმყოფება, სტაციონარში მეთვალყურეობის ქვეშ — 522.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: