პრეზიდენტმა სალომე ზურაბიშვილმა საქართველოს მთელს ტერიტორიაზე საგანგებო მდგომარეობის მოქმედების ვადის 22 მაისის ჩათვლით გაგრძელების შესახებ ბრძანება გამოსცა. მისი თქმით, ამავე ვადით გაგრძელდება არსებული დეკრეტის მოქმედება, რომელიც დამატებით შეზღუდვებს არ ითვალისწინებს.

ზურაბიშვილის თქმით, იმისათვის, რომ ქვეყანამ პირველ ეტაპზე მიღწეული სამაგალითო შედეგები შეინარჩუნოს, არსებული რეჟიმი გარკვეული ხნით კიდევ უნდა დაიცვას.

"მიღებულმა ზომებმა განაპირობა ის, რომ შევძელით და დაავადების გავრცელების ტემპი და მასშტაბი კონტროლის ქვეშ მოვაქციეთ. თუმცა, ჩვენს წინაშე არსებული გამოწვევა არ გვაძლევს უფლებას მოვადუნოთ ყურადღება და შეზღუდვები ნაადრევად მოვხსნათ. ყველა არსებული გათვლა და პროგნოზი შემდეგ 2-3 კვირაში ეპიდემიის შიდაგავრცელების ზრდის დიდ საფრთხეზე მიუთითებს", — განაცხადა ზურაბიშვილმა.

საგანგებო მდგომარეობის ვადის გახანგრძლივების თაობაზე პრეზიდენტს პრემიერ-მინისტრმა მიმართა. ხვალ, 22 აპრილს, პარლამენტის სესიაზე აღნიშნულ საკითხს კენჭს უყრიან. როგორც ცნობილია, საგანგებო მდგომარეობის გახანგრძლივებას უმრავლესობის დეპუტატების მხარდაჭერა აქვს. ოპოზიცია კი მთავრობისაგან დასაბუთებასა და ახსნა მოითხოვს, თუ რატომაა საჭირო გაგრძელება.