სახელმწიფო უსაფრთხოების სამსახურის ინფორმაციით, სამართალდამცავებმა ქრთამის მიცემის ფაქტზე საქართველოს ერთი მოქალაქე დააკავეს.

უწყების ცნობით, გამოძიებამ დაადგინა, რომ აღნიშნულმა პირმა ზესტაფონის აგრარული ბაზრის მიმდებარედ, ერთ-ერთი მაღაზიის სარდაფიდან, გვირაბი კუსტარულად გაიყვანა, მიწის ქვეშ არსებული სილიკომანგანუმის ქერქული ნარჩენები - ე.წ. წიდი უკანონოდ მოიპოვა და შემდეგ მისი რეალიზებით უკანონო შემოსავლების წყაროს იღებდა.

სუს-ის ინფორმაციით, დაკავებულმა გარემოსა და ბუნებრივი რესურსების სამინისტროს ერთ-ერთ თანამშრომელს აღნიშნული საქმიანობის მფარველობის სანაცვლოდ 700 ლარის ოდენობის ქრთამი შესთავაზა, ხოლო სამუშაოების წარმატებით გაგრძელების შემთხვევაში, სხვადასხვა თანხის პერიოდულად გადახდა დაპირდა:

"ამირან შ-მ საჯარო მოხელეს ქრთამის სახით შეპირებული თანხა - 700 ლარი გადასცა, რა დროსაც იგი ბრალდებულის სახით დააკავეს".

გამოძიება ქრთამის მიცემის ფაქტზე, სისხლის სამართლის კოდექსის 339-ე მუხლის მე-2 ნაწილით დაიწყო, რას სასჯელის სახით თავისუფლების 4-დან 7 წლამდე აღკვეთას ითვალისწინებს:

"გამოძიება გრძელდება ე.წ. წიდის უკანონო მოპოვებით გარემოზე მიყენებული ზიანის ოდენობის დადგენისა და დანაშაულში შესაძლო სხვა დამნაშავე პირების გამოვლენის მიზნით".