პარლამენტის ქართული ოცნების დეპუტატი ლადო კახაძე აცხადებს, რომ ოპოზიცია რუსეთიდან იმართება და ბორდერიზაციის პროცესის განახლება ოკუპანტი სახელმწიფოს მხრიდან, სწორედ მათთვის "გადაგდებული თემაა".

"რუსეთმა ძალიან კარგად იცის, რომ სალაპარაკო თემა გამოელია ოპოზიციას და ახლა ამ თემას გადაუგდებს. ეს მათ კარგად იციან იმიტომ, რომ ოპოზიცია იქიდან იმართება.

ყველაფერს გააკეთებენ, რომ მაქსიმალურად, აი, ამ ბრძოლაში შესულ ხელისუფლებას, რომელიც კოორდინაციითაც, იერარქიითაც, პრიორიტეტების მინიჭებითაც... აი, ეს ყველაფერი არ მოწონს ამ ქვეყანას, დიახ, არ მოსწონს და ზუსტად იმას აკეთებს.

სავარგულებს გადაუვლიან, გადახნიან და იმის იმედად არის საქართველო, რომ იქ მოყვანილი ხეხილით ან კიტრით და პომიდორით ირჩინოს მერე თავი და ეს თემა იქნება ოპოზოციის სალაპარაკო. მე ეს ვიცი რომ იქნება, მზადა ვარ ამისათვის", — განაცხადა მან TV PalitraNews-ის ეთერში.

ქარელში, სოფელ ტახტისძირის მიმდებარედ საოკუპაციო ძალებმა ე.წ. საზღვრის უკანონო გადმოწევა განაახლეს. საქართველოს საგარეო საქმეთა სამინისტრო აცხადებს, რომ ქარელში საოკუპაციო ძალების მიერ ხელოვნური ბარიერების აღმართვით მოსახლეობას სასოფლო-სამეურნეო მიწის ნაკვეთებზე წვდომა შეზღუდვა.

უწყება მოუწოდებს რუსეთს, დაუყოვნებლივ შეწყვიტოს პროვოკაციული და დესტრუქციული მოქმედებები და შეასრულოს ნაკისრი საერთაშორისო ვალდებულებები, მათ შორის, ევროკავშირის შუამავლობით 2008 წლის 12 აგვისტოს დადებული ცეცხლის შეწყვეტის შეთანხმება.

საგარეო საქმეთა სამინისტრო მიმართავს საერთაშორისო თანამეგობრობას, სათანადო შეფასება მისცეს და ქმედითი ზომები მიიღოს საოკუპაციო ხაზზე მიმდინარე უკანონო პროცესებთან დაკავშირებით.

ოკუპანტების ქმედებებს გამოეხმაურა სახელმწიფო მინისტრი ქეთევან ციხელაშვილიც. მისი თქმით, ამოქმედებულია ცხელი ხაზი და ინფორმირებულია ყველა საერთაშორისო პარტნიორი.