ევროპული საქართველოს ლიდერი, გიგა ბოკერია პრემიერ-მინისტრის, გიორგი გახარიას განცხადებას გამოეხმაურა, რომ ეკლესიაში სიარულის თავშეკავებაზე მოქალაქეების იმედი აქვთ.

"ვისი შეგნების იმედზეც უნდა ვიყოთ, იმათ არ სჭირდებათ მთავრობის შეზღუდვები და პრემიერ მინისტრი. ვისაც განსხვავებული მოსაზრება აქვთ, მათთვის ლეგიტიმური, ჩემთვის იუღებელი მრწამსით, რომ რელიგიური რიტუალის დროს ვირუსი არ გადადის, ვინც არ ემორჩილება, იქაა მთავრობა საჭირო", — აღნიშნა გიგა ბოკერიამ TV პირველის ეთერში.

დღეს, 14 აპრილს პრემიერ-მინისტრმა, გიორგი გახარიამ განაცხადა, რომ "გონიერი და ბრძენი მოქალაქე" უნდა მიხვდეს, რომ პასუხისმგებლობა ეკლესიას არ დააკისროს. მისივე თქმით, მოქალაქემ ეკლესია არჩევანის წინაშე არ უნდა დააყენოს.

საგანგებო მდგომარეობისა და შეზღუდვების მიუხედავად მართლმადიდებელი ეკლესიის საპატრიარქო მრევლის თანდასწრებით ღვთისმსახურებას მაინც აღავლენს. 12 აპრილს, ბზობას მოქალაქეების ნაწილი ეკლესიის მიერ დაპირებულ დისტანციას არ იცავდა და ხალხმრავლობაში ბზას ყიდულობდა.

როგორც ცნობილია, 19 აპრილს საპატრიარქო სააღდგომო ლიტურგიას კომენდანტის საათის დროს ჩაატარებს, თუმცა მრევლის როგორ დაესწრება ღვთისმსახურება, ჯერ უცნობია. დეკანოზ ანდრია ჯაღმაიძის თქმით, ამის შესახებ დეტალური ინფორმაცია ხვალ, 15 აპრილს გახდება ცნობილი.

14 აპრილს ცნობილი გახდა, რომ კორონავირუსი დაუდასტურდა თბილისში, წმ. იოანე ღვთისმეტყველის სახელობის ტაძრის ერთ-ერთ სასულიერო პირს. ის კლინიკაში ოჯახის ორ წევრთან ერთადაა მოთავსებული.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

12 აპრილს ცნობილი გახდა, რომ მართლმადიდებელ ეკლესიებში სააღდგომო ღვთისმსახურებას კომენდანტის საათის დროს ჩაატარებენ.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

ბოლო მონაცემებით, საქართველოში კორონავირუსით ინფიცირებულია 296 ადამიანი, მათგან გამოჯანმრთელებულია 69, ხოლო გარდაცვლილი — 3.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: