დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

კორონავირუსით ინფიცირებული სასულიერო პირი, რომელიც ვერაზე, წმინდა იოანე ღვთისმეტყველის ტაძარში მსახურობს, ამბობს, რომ ბოლოს ეკლესიაში ხარების დღესასწაულზე იყო, დისტანციურად ჩაატარა წირვა და ეზიარა კიდეც. ამის შესახებ მან TV პირველს სატელეფონო ინტერვიუში განუცხადა.

მან ზუსტად არ იცის, ეზიარა თუ არა მრევლიც.

"ხო, ალბათ მრევლიც ეზიარა, მე გარეთ არ გავსულვარ", — აღნიშნა სასულიერო პირმა.

მისი თქმით, მაღალი სიცხეები ჰქონდა და მისი და, რომელიც ექთანია, გადასხმებს სახლში უკეთებდა. თუმცა, სასულიერო პირი აღნიშნავს, რომ იმყოფებოდა საავადმყოფოშიც და ინფიცირებას სწორედ იქედან ვარაუდობს.

"მე ზოგადად ბრონქების პრობლემა მაქვს და მაგის გამოც სისუსტეები, მით უმეტეს მარხვაში, მკაცრად იმას ვშვები და მაგიტომ მიკეთებდა", — ამბობს სასულიერო პირი.

აღსანიშნავია, რომ მას შემდეგ, რაც კორონავირუსის პირველი შემთხვევები საქართველოში დადასტურდა, მოქალაქეების ნაწილი აქტიურად ითხოვს საპატრიარქომ საერთო კოვზით ზიარებაზე უარი თქვას, თუმცა უშედეგოდ — ეკლესია ამტკიცებს, რომ ერთი ბარძიმიდან ზიარება მრევლის ქრისტესთან და ერთმანეთთან ერთობის და სიყვარულის უმაღლესი დადასტურებაა და ვინც ამაზე ამბობს უარს, "უარს ამბობს მაცხოვარზე!".

ინფორმაცია იმის შესახებ, რომ სასულიერო პირს კორონავირუსი აქვს, გუშინ, 13 აპრილს გავრცელდა და დღეს დაადასტურეს. ის კლინიკაში ოჯახის ორ წევრთან ერთადაა მოთავსებული.

პირველ აპრილს პატრიარქმა ილია მეორემ გაავრცელა მიმართვა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

12 აპრილს ცნობილი გახდა, რომ მართლმადიდებელ ეკლესიებში სააღდგომო ღვთისმსახურებას კომენდანტის საათის დროს ჩაატარებენ.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

ბოლო მონაცემებით, საქართველოში კორონავირუსით ინფიცირებულია 296 ადამიანი, მათგან გამოჯანმრთელებულია 69, ხოლო გარდაცვლილი — 3. კარანტინის რეჟიმში 4 834 ადამიანი იმყოფება, სტაციონარში მეთვალყურეობის ქვეშ კი 434.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: