ფრანგი მსახიობი და რუსეთის მოქალაქე ჟერარ დეპარდიე რუსულ კომედიაში სპორტი საზღვრების გარეშე, რომელიც 2014 წლის სოჭის ზამთრის ოლიმპიადას მიეძღვნება, მთავარ როლს შეასრულებს.

დეპარდიე სერგეი რომანოვის როლს მოირგებს, რომელიც რუსეთის მოთხილამურეთა გუნდის მწვრთნელია და ცდილობს ყველა იმ პრობლემას გაუმკლავდეთ, რომელიც ოლიმპიადას თან ახლდა. რომანოვი იდეალისტია, გამარჯვებისთვის კი ყველაფერზეა წამსვლელი, სწორედ ამიტომ, ის თამამი ნაბიჯების გადადგმას არ ერიდება და ავსტრიელ დამხმარეს ქირაობს, რომელიც თავისი მიუღებელი სწავლების მეთოდებით არის ცნობილი.

ფილმის ბიუჯეტი $3.5 მილიონი დოლარია და მისი რეჟისორი ალექსანდრ ლომაკინი იქნება.

სოჭის ოლიმპიადა ცნობილია კორუფციული სქემებითა და ყველაზე დაუგეგმავი ტურნირებით. თუმცა, როგორც ცნობილია, კომედიურ ფილმში ამაზე აქცენტი არ გაკეთდება, გასაკვირი არც არის, რადგან დეპარდიეს კარგი ურთიერთობა აქვს კრემლთან, შესაბამისად ისეთ პროექტში, რომელიც სულ მცირე ნეგატიური კონტექსტით მაინც შეეხებოდა პუტინის ხელისუფლებას ის არ დასთანხმდებოდა.

ფოტო: The Telegraph

მას შემდეგ რაც ვლადიმერ პუტინის განკარგულებით 2013 წლის იანვარში დეპარდიემ რუსეთის მოქალაქეობა მიიღო, ის აქტიურად ჩნდება რუსულ პროექტებში, ის უკვე გადაიღეს სერიალში, რომელიც დოსტოევსკის რომანი ძმები კარამაზოვების ეკრანიზაციაა.