პარტია ახალი საქართველოს ლიდერი, გიორგი ვაშაძის თქმით, ხელისუფლება ცდილობს ამ სიტუაციაში პოლიტიკური დივიდენდები დაიწეროს და ხელი მოითბოს. მისი თქმით, აუცილებელია მმართველმა გუნდმა პასუხისმგებლობა აიღოს და საზოგადოებას აღდგომასთან დაკავშირებული სამოქმედო გეგმა გააცნოს.

"მივმართავ პრემიერს, აიღეთ თქვენ თავზე პასუხისმგებლობა გამოდით და გვითხარით როგორია მოქმედების წესი და ყველა დავემორჩილებით ამ წესს. არანაირი პოლიტიკური კრიტიკა და დისკუსია ამაზე არ იქნება. ჭირსაც წაუღია პოლიტიკა, ხალხის ჯანმრთელობასთან გვაქვს საქმე. კიდევ ერთხელ გთხოვთ და მოგიწოდებთ, იყავით ძლიერები, აიღეთ პასუხისმგებლობა", — თქვა გიორგი ვაშაძემ.

ვაშაძის აზრით, ამ დრომდე გეგმის არარსებობას ორი მიზეზი აქვს. პირველი ის, რომ ქართული ოცნება ცდილობს საზოგადოების მოთხოვნები ეკლესიისა და მორწმუნეებს წინააღმდეგ ბრძოლად გაასაღოს. მისი თქმით, მეორე მიზეზი კი ისაა, რომ თუ ეს ყველაფერი ეპიდაფეთქებას გამოიწვევს, მაშინ ხელისუფლება ხელს ეკლესიისკენ გაიშვერს და მრევლის დაუდევრობას დააბრალებს.

გუშინ, 13 აპრილს საპატრიარქოში შეხვედრაზე იმყოფებოდნენ პრემიერ-მინისტრი გიორგი გახარია და დაავადებათა კონტროლის ეროვნული ცენტრის დირექტორი ამირან გამყრელიძე. მედიის ინფორმაციით, საპატრიარქოში იყვნენ თბილისის მერი, კახა კალაძე და მინისტრთა კაბინეტის წევრები, მათ შორის: ვიცე-პრემიერები — მაია ცქიტიშვილი და თეა წულუკიანი, შინაგან საქმეთა და ჯანდაცვის მინისტრები.

შეხვედრასთან დაკავშირებით ოფიციალური კომენტარი ჯერ არ გაკეთებულა, თუმცა, სავარაუდოდ, შეხვედრის თემა სააღდგომო ლიტურგია იყო.

ბოლო მონაცემებით, საქართველოში კორონავირუსის 296 დადასტურებული შემთხვევაა, მათგან გამოჯანმრთელებულია 68 ადამიანი, ხოლო გარდაცვლილია 3. კარანტინის რეჟიმში 4 834 ადამიანი იმყოფება, სტაციონარში მეთვალყურეობის ქვეშ კი 434.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: