"ყველა ინსტიტუციას თანაბრად მოეთხოვოს მოქალაქეთა შეკრების წესების დაცვა" — ამ მოთხოვნით ხელმომწერები ონლაინ პეტიციას ავსებენ. მოქალაქეების ხელისუფლებას მოუწოდებენ დაიცვან სიცოცხლის უფლება.

პეტიციის ტექსტში ნათქვამია, რომ სეკულარულ სახელმწიფოში ეპიდემიის გავრცელების აღსაკვეთად, პირველ რიგში, ეკლესიებსა და სხვა რელიგიურ დაწესებულებებში შეკრების წესი უნდა შეიზღუდოს.

"მოგიწოდებთ, დაიცვათ მოქალაქეების სიცოცხლის უფლება და ყველა ინსტიტუციას, შერჩევითი პრინციპის გარეშე, მკაცრად მოეთხოვოს საჯარო შეკრების დროებითი წესებისა და უსაფრთხოების სხვა ნორმების დაცვა, მათ შორის, ზიარების წესის კომპრომისული ხერხით შეცვლა", — წერია პეტიციის ტექსტში.

გარდა ამისა, მოქალაქეები ამ პეტიციით მხარს უჭერენ, რომ ყველა ძირითადი თავისუფლება ხელშეუხებელი დარჩეს. ასევე, დაიწყოს მუშაობა სახელმწიფოსა და ეკლესიას შორის გაფორმებული კონკორდატის გასაუქმებლად.

პეტიცია სამი კვირის წინ დარეგისტრირდა და მას 4 000-ზე მეტი ხელმოწერა აქვს.

კორონავირუსის გამო საქართველოში საგანგებო მდგომარეობა და ე.წ. კომენდანტის საათი მოქმედებს. მიუხედავად შეზღუდვებისა, საქართველოს მართლმადიდებელი ეკლესია ღვთისმსახურებას მრევლის თანდასწრებით ატარებს. 12 აპრილს ბზობის დღესასწაულზე ტაძრების ნაწილში საპატრიარქოს მიერ დაპირებული დისტანცია დაცული არ იყო.

გარდა ამისა, ცნობილი გახდა, რომ ეკლესია სააღდგომო ღვთისმსახურებას 19 აპრილს კომენდანტის საათის დროს ჩაატარებს. თუმცა როგორ შეიკრიბება მრევლი ეკლესიაში საპატრიარქოს ჯერ არ განუმარტავს.

საქართველოში კორონავირუსით ინფიცირების 266 შემთხვევაა დაფიქსირებული. ინფიცირებულთა შორის 67 პაციენტი გამოჯანმრთელებულია, ხოლო 3 გარდაცვლილი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: