ევროპული საქართველოს ლიდერის, ელენე ხოშტარიას განცხადებით, გამარჯვებული საქართველოს ლიდერის, ირაკლი ოქრუაშვილისთვის პატიმრობის მისჯა უტიფარი პოლიტიკური გადაწყვეტილებაა. ამ თემაზე მან მედიასთან ისაუბრა და თქვა, რომ 20 ივნისს მომხდარ ძალადობაზე ბრძანების გამცემი ადამიანები უნდა გასამართლდნენ.

"თუ მათ [ქართულ ოცნებას] მართლაც უნდათ პოლიტიკური პროცესის ნორმალიზება, რაზეც პირობა დადეს ქვეყნის შიგნით და ქვეყნის გარეთ, ამის ერთადერთი გზა პოლიტპატიმრების გამოშვებაა. უნდა მიიღონ გადაწყვეტილება და გაათავისუფლონ. ამის გზები არსებობს", — თქვა ელენე ხოშტარიამ.

დეპუტატმა აღნიშნა, რომ ხელისუფლების მხრიდან კორონავირუსის გამო შექმნილი კრიზისით სარგებლობა ამორალურია.

დღეს, 13 აპრილს თბილისის საქალაქო სასამართლომ 20 ივნისის საქმეზე ბრალდებულ ირაკლი ოქრუაშვილის 5 წლით თავისუფლების აღკვეთა მიუსაჯა. სასამართლომ ოქრუაშვილი ძალადობის ორგანიზების ნაწილში გაამართლა, ხოლო მონაწილეობის განხრით გაამტყუნა. 20 ივნისის საქმეზე ამ დრომდე 20-მდე პირია პასუხისგებაში მიცემული, მათ შორისა ნაცინალური მოძრაობის ერთ-ერთი ლიდერი ნიკა მელიაც, რომელიც განაჩენს ელოდება.