ბორჯომში ცხოველის მიმართ სასტიკი მოპყრობისსთვის დაკავებულ პირს ბრალი წარუდგინეს. ამის შესახებ ინფორმაციას პროკურატურა ავრცელებს.

უწყების ინფორმაციით, მთვრალ მდგომარეობაში მყოფმა პირმა ბორჯომში მდებარე ერთ-ერთი საცხოვრებელი კორპუსის მე-12 სართულიდან ძაღლი გადააგდო, რის შედეგად ცხოველმა ჯანმრთელობის სხვადასხვა სახის დაზიანება მიიღო.

მათივე ინფორმაციით, დაკავებულს ბრალი სისხლის სამართლის კოდექსის 259-ე მუხლის პირველი ნაწილით აქვს წარდგენილი, რაც ცხოველისადმი სასტიკი მოპყრობა გულისხმობს, რამაც მისი დასახიჩრება გამოიწვია. აღნიშნული ბრალი სასჯელის სახით ერთ წლამდე თავისუფლების აღკვეთას ითვალისწინებს.

პროკურატურის ინფორმაციით, სასამართლოს შუამდგომლობით მიმართეს და ბრალდებულისთვის აღკვეთის ღონისძიების სახით 5000-ლარიანი საპატიმრო გირაოს შეფარდება მოითხოვეს.

მათივე ინფორმაციით, სასამართლომ ნაწილობრივ დააკმაყოფილა ბრალდების მხარის შუამდგომლობა და ბრალდებულ აღკვეთის ღონისძიების სახით შეეფარდა ხელწერილი გაუსვლელობისა და სათანადო ქცევის შესახებ. რის გასაჩივრებასაც პროკურატურა გეგმავს.