თეთრი ხმაურის მოძრაობის ერთ-ერთმა აქტივისტმა და კლუბის მტკვარზე დამფუძნებელმა On.ge-სთან საუბარში თქვა, რომ კრიმინალურმა პოლიციამ ქუთაისის საავადმყოფოში ტომოგრაფიის გადასაღებად გადაიყვანა. როგორც თავად ჰყვება, ბერლინიდან ჩამოსვლისას პოლიციამ გაჩხრიკა და მას შემდეგ, რაც ვერაფერი იპოვა, ტომოგრაფიის გადასაღებად გადაიყვანა:

"ქუთაისის აეროპორტში ჩამოვედით ბერლინიდან. ერთი კვირით ვიყავით მე და ჩემი 5 მეგობარი. ოპერატიული ინფორმაციის საფუძველზე გაგვაჩერა კრიმინალურმა პოლიციამ. უკვე გამოვლილი გვქონდა რეგისტრაციის პუნქტები. გაგვიყვანეს ცალკე, გაგვჩხრიკეს და რომ ვერ აღმოგვიჩინეს ვერაფერი, ქუთაისის საავადმყოფოში ტომოგრაფიაზე გადაგვიყვანეს, იმის დასადგენად, რამე რომ არ გვაქვს გადაყლაპული და ისე ხომ არ გადმოგვაქვს საზღვარზე".

შინაგან საქმეთა სამინისტროში On.ge-ს განუცხადეს, რომ ქუთაისში დავით აღმაშენებლის სახელობის აეროპორტში, ოპერატიული ინფორმაციის მიღების საფუძველზე, შესაბამისი ღონისძიება მიმდინარეობს. უწყება დამატებითი დეტალების შესახებ კომენტარს არ აკეთებს. მათივე თქმით, დამატებით ინფორმაციას აეროპორტში მიმდინარე ღონისძიებასთან დაკავშირებით, მოგვიანებით გაავრცელებენ.