Rick and Morty-ის მაყურებლები მიჩვეულები არიან, რომ ამ ცნობილი შოუსგან მუდმივად სიურპრიზებს უნდა ელოდნენ და გამონაკლისი არც საყოველთაო თვითიზოლაციის პერიოდში მომხდარა: 28 მარტს Adult Swim-მა Rick and Morty-ის სამყაროში განვითარებული ახალი ისტორიის შესახებ ხუთწუთიანი ვიდეო გაავრცელა.

YouTube-ზე გამოქვეყნებული ვიდეო უფრო მეტად ამ ანიმაციური შოუს ერთგვარი მოკლემეტრაჟიანი ეპიზოდია: თითქმის 6 წუთის ხანგრძლივობის Samurai & Shogun ანიმეს სტილში გაცოცხლებული რიკისა და მორტის ერთ-ერთი პარალელური ცხოვრების შესახებ მოგვითხრობს.

აღსანიშნავია, რომ ამ ვიდეოს შექმნაზე იაპონურმა ანიმაციურმა სტუდიომ Studio Deen-მა იმუშავა, რომელსაც მანამდე ისეთი ცნობილი ანიმეები აქვს შექმნილი, როგორებიცაა Patlabor, Ranma 1/2 და Simoun.

მიუხედავად იმისა, რომ ამ ახლადგავრცელებულ ვიდეოში შენარჩუნებულია Rick and Morty-ისთვის დამხასიათებელი სამეცნიერო ფანტასტიკის ელემენტები (მაგალითად, პორტალები), ის მთლიანად ანიმეს სტილშია შექმნილი: იქნება ეს ბრძოლის ვიზუალიზაცია თუ დრამატული სცენები.

დიდი ალბათობით, ეს ერთჯერადი თანამშრომლობის შედეგი იყო, თუმცა ვინ იცის, იქნებ წინ ამ სტილით შექმნილი რიკისა და მორტის ანიმე თავგადასავლის მთელი სერია გველოდება.

ფოტო: Giphy