აშშ-ს ელჩი საქართველოში, კელი დეგნანი მოსახლეობას მოუწოდებს დარჩნენ შინ და გაითვალისწინონ მთავრობის რეკომენდაციები. ელჩი ამბობს, რომ თავადაც სახლიდან მუშაობს, როგორც საელჩოს სხვა თანამშრომლები.

"რთული დროა და ვცდილობთ, გავუფრთხილდეთ ჩვენი და ჩვენი ახლობლების ჯანმრთელობასა და უსაფრთხოებას. ამერიკის საელჩოში განსაკუთრებით მადლიერები ვართ საქართველოს მთავრობის, მათ შორის, დაავადებათა კონტროლის ეროვნული ცენტრისა, მათი პროაქტიული ძალისხმევისთვის. პრემიერ-მინისტრი, პრეზიდენტი, თითქმის ყველა სამინისტრო, პარლამენტი და მუნიციპალიტეტები ძალისხმევას არ იშურებს, რომ შეაკავოს COVID-19 ვირუსის გავრცელება და მინიმუმამდე დაიყვანოს მის მიერ გამოწვეული ზიანი. მინდა მადლობა გადავუხადო სამედიცინო სფეროს თანამშრომლებს, მესაზღვრეებს, პოლიციასა და სხვა საჯარო მოხელეს პანდემიასთან ბრძოლაში გაწეული შრომისთვის", — ამბობს აშშ-ს ელჩი.

კელი დეგნანის თქმით, საგანგებო მდგომარეობის პირობებში შეზღუდულია საელჩოს ფუნქციონირება და ვიზიტორების მიღება. ხორციელდება მხოლოდ გადაუდებელი სავიზო გასაუბრებები და ამერიკის მოქალაქეების მიღება.