მას შემდეგ, რაც სამხრეთ კორეულმა ფილმმა პარაზიტი ისტორიული გამარჯვება მოიპოვა ოსკარების დაჯილდოებასა და კანის კინოფესტივალზე, ყველა ელოდება, თუ რა იქნება ამ შედევრის რეჟისორის, ბონგ ჯუნ ჰოს შემდეგი ფილმი.

სულ ცოტა ხნის წინ ჟურნალ Empire-თან მიცემულ ინტერვიუში აღნიშნა, რომ "მიუზიკლს სიამოვნებით გადაიღებდა". იმ ოსტატობის შემდეგ, რაც ბონგ ჯუნ ჰომ ფილმში პარაზიტი გვაჩვენა, ნებისმიერ ჟანრში გამოვლენილ მის შესაძლებლობებში ეჭვის შეტანა გაგვიჭირდება, თუმცა პარაზიტის, ამ ძალიან მძიმე სოციალური თემატიკის მქონე კინოსურათის შემდეგ მის მიერ გადაღებული მიუზიკლის წარმოდგენა, ალბათ, ყველასთვის რთული იქნება.

თუმცა, ამ სამხრეთ კორეელი რეჟისორის შემდეგი განმარტება ყველაფერს ნათელს ჰფენს და სკეპტიკურ ეჭვებს გვიფანტავს:

"ჩემს მიუზიკლში პერსონაჟები სიმღერას რომ დაიწყებდნენ, უცებ გაიფიქრებდნენ: "ღმერთო ჩემო, რა *ლეობაა, ეს უკვე მეტისმეტი გოიმობაა" და მალევე შეწყვეტდნენ სიმღერას. არსებობს ნამდვილად კარგი მიუზიკლები, ისეთი, როგორიცაა Singin' in the Rain, მაგრამ, როცა ასეთ ფილმებს ვუყურებ, თავს ძალიან უხერხულად ვგრძნობ და ვწითლდები. ასე რომ, ჩემი ფილმი განსხვავებული იქნებოდა".

ბონგ ჯუნ ჰომ მიუზიკლის გადაღება მართლაც რომ დააპიროს, ის ყველაზე უჩვეულო ფილმი იქნება ამ ჟანრში, რაც ოდესმე გვინახავს.

ფოტო: Giphy

თუმცა რეჟისორმა რამდენიმე კვირის წინ იმაზეც ისაუბრა, რომ გასული წლით გამოწვული ემოციებით გადაღლილია და ახალი ფილმის გადაღება, შესაძლოა, უახლოეს მომავალში ვერ შეძლოს.

"ახლა დრო ნამდვილად მაქვს, რომ კინოზე მუშაობას კვლავ დავუბრუნდე, მაგრამ მენტალურად და ფიზიკურად მეტისმეტად გადაღლილი ვარ. ადამიანის სხეულში ვარ გამომწყვდეული", — განაცხადა მან.

მის მიერ გადაღებულ ახალ ფილმს ან მეტიც, მიუზიკლს თუ მალე ვერ ვიხილავთ, ის მაინც ვიცით, რომ ბონგ ჯუნ ჰო HBO-სთან ერთად პარაზიტის სერიალზე მუშაობს, შესაბამისად, ისღა დაგვრჩენია, ამ დამაინტრიგებელი პროექტის შედეგებს დაველოდოთ.