პრემიერ-მინისტრ, გიორგი გახარიას თქმით, მთავრობის გადაწყვეტილებით, ტურიზმის სფეროსთან დაკავშირებულ 18 ათასს კომპანიასა და ამ სფეროში 50 ათასს დასაქმებულ პირს 4 თვით ქონებისა და საშემოსავლო გადასახადი გადაუვადდებათ. მისი განმარტებით, ეს იმას ნიშნავს, რომ ივნისიდან გადასახადების გადახდას ჩვეულებრივ რეჟიმში გააგრძელებენ, ხოლო მარტიდან ივნისამდე გადავადებული დავალიანების გადახდას კი პირველი ნოემბრიდან დაიწყებენ.

მისივე თქმით, ეს ამ სექტორში დაახლოებით დამატებით 100 მილიონზე მეტ ფინანსურ რესურსს დატოვებს.

"მთავრობამ ამ ეტაპზე ტურიზმთან დაკავშირებული ისეთ დარგებში და ისეთი კომპანიებისთვის, რომლებიც საქმიანობენ სასტუმროებისა და რესტორნების, ტურისტული სააგენტოების, სატრანსპორტო კომპანიების, საექსკურსიო კომპანიების და სხვა სფეროებში 4 თვით, პირველ ნოემბრამდე, გადაუვადებს ქონების და საშემოსავლო გადასახადს", — განაცხადა გახარიამ.

გარდა ამისა, პრემიერის თქმით, სახელმწიფო აქამდე დაგეგმილი 600 მილიონი დღგ-ს ნაცვლად, ეკონომიკას და კომპანიებს დაუბრუნებს დამატებით 600 მილიონს, "რაც დღგ-ს საშუალებით ერთი წლის განმავლობაში ეკონიმიკას დაუბრუნებს მილიარდ ორასი მილიონის ფინანსურ რესურსს".

პრემიერის განცხადებით, ეკონომიკური სტიმულირებისთვის მილიარდი ლარია მობილიზებული. ამასთანავე ინფრასტრუქტურული პროექტებისთვის სახელმწიფო წლის ბოლომდე დამატებით 300 მილიონ ლარს მიმართავს. მისივე თქმით, თუ საჭირო გახდა დახმარებისთვის მიმართავენ ყველას, პირველ რიგში, კი ქართუ ფონდს.

გახარიას განმარტებით, მიიღეს გადაწყვეტილება, რომ ტურიზმის სექტორის დარგში კომპანიებს 4 თვით გადაუვადებენ ქონებისა და საშემოსავლო გადასახადს. ასევე, 4 ნომრიდან 50 ნომრამდე სასტუმროებისთვის საპროცენტო მომსახურებას სახელმწიფო დაფარავს. მისივე თქმით, ობიექტური საჭიროების შემთხვევაში კერძო კომპანიებს ბანკები სესხის რესტრუქტურიზაციით უზრუნველყოფენ.

ამავე პროგრამის ფარგლებში, პრემიერის თქმით, საბანკო სექტორთან ერთად მიიღეს გადაწყვეტილება, რომ ფიზიკური პირები 3 თვის განმავლობაში, აუცილებლობის შემთხვევაში, გათავისუფლებული იქნებიან სასესხო ვალდებულებებისგან.

პრემიერმა ისაუბრა იმაზეც, რომ ლარის კურსის ვარდნაზე გავლენა იქონია პანდემიასთან დაკავშირებულმა გამოწვევებმა. მისი თქმით, ეკონომიკური გუნდი მუშაობს ამ საკითხზე და დარწმუნებული არის, რომ ლარის კურსი შესაბამის საბალანსო ნიშნულს დაუბრუნდება.

11 მარტს ჯანდაცვის მსოფლიო ორგანიზაციამ COVID-19, იგივე კორონავირუსი, რომელმაც გავრცელება 3 თვის წინ დაიწყო, საერთაშორისო პანდემიად გამოაცხადა. საქართველოში კორონავირუსით ინფიცირების 25 შემთხვევაა დადასტურებული.