დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

დაავადებათა კონტროლის ცენტრის ხელმძღვანელის, ამირან გამყრელიძის თქმით, ახალი კორონავირუსის პანდემია, მსოფლიოში პირველი ყველაზე სწრაფად დამარცხებადი პანდემია იქნება. მისი თქმით, მოქალაქეები პანიკას არ უნდა მიეცნენ, რადგან დღეს საზოგადოება გლობალურადაც და საქართველოშიც უფრო მომზადებულია პანდემიასთან გასამკლავებლად.

"ხაზი მინდა გავუსვა, რომ ეს ინფექცია ოდნავ რთულია,ვიდრე გრიპი და გრიპის ვირუსით გამოწვეული ინფექცია, მაგრამ ის დაძლევადია. ნამდვილად დაძლევადია. იგივე ტედ როსი, ჯანმრთელობის მსოფლიო ორგანიზაციის დირექტორი ამბობს, რომ ალბათ, პირველად იქნება ისტორიაში შემთხვევა, როდესაც პანდემია სწრაფად დამარცხდება. ყველაზე დიდი პანდემიები, რაც ყოფილა მედიცინის ისტორიაში, მაგალითად გრიპის პანდემია, რომელმაც 5 მილიონი ადამიანი შეიწირა, 5 წელიწადი გაგრძელდა", — განაცხადა გამყრელიძემ tv პირველის ეთერში.

მისივე თქმით, პანდემიის გამო გაიზრდება ისეთი ქვეყნების რიცხვი, საიდანაც მოგზაურობიდან დაბრუნებულებს თვითიზოლაციაში ყოფნა მოუწევთ.

გამყრელიძე კიდევ ერთხელ მოუწოდებს მოქალაქეებს, რომ სოლიდარობა და დიდი სამოქალაქო პასუხისმგებლობა გამოიჩინონ.

ჯანდაცვის მსოფლიო ორგანიზაციამ COVID-19, იგივე კორონავირუსი, რომელმაც გავრცელება 3 თვის წინ დაიწყო, საერთაშორისო პანდემიად დღეს, 11 მარტს გამოაცხადა.

საქართველოში კორონავირუსით ინფიცირების 24 შემთხვევაა დადასტურებული: პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს, 7 მარტს კორონავირუსით ინფიცირების კიდევ 4 შემთხვევა დადასტურდა, 9 მარტს კორონავირუსი 2 პაციენტს დაუდასტურდა, 10 მარტს კი კორონავირუსის კიდევ 8 შემთხვევა დადასტურდა, კიდევ 1 შემთხვევა კი — 11 მარტს.

ასევე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: