საქართველოსა და სომხეთის მოქალაქეები ორ ქვეყანას შორის საზღვარს ID ბარათებით გადაკვეთენ. ცვლილების ძალაში შესვლის თარიღი ჯერჯერობით უცნობია. სომხეთის საგარეო საქმეთა სამინისტროს საიტზე ვრცელდება პრესსპიკერის განცხადება, ორ ქვეყანას შორის მიმოსვლის პროცედურების გამარტივების შესახებ.

პრესსპიკერის თქმით, გუშინ 3 მარტს სომხეთისა და საქართველოს საგარეო საქმეთა მინისტრებმა აღნიშნეს, რომ ხალხთა შორის კონტაქტებისა და საზოგადოებებს შორის კავშირების გაძლიერებაა საჭირო. მათ ხელი მოაწერეს მემორანდუმს, რომელიც ამ ცვლილებას ითვალისწინებს.

"მემორანდუმის ხელმოწერა იძლევა საფუძველს, რომ მოლაპარაკებები დაიწყოს შესაბამისი ორმხრივი საერთაშორისო ხელშეკრულების დადების შესახებ. კანონმდებლობის შესაბამისად, უზრუნველყოფილი ხელშეკრულების გაფორმებისა და მისი ძალაში შესვლის ეტაპები". — აღნიშნა პრესსპიკერმა.

On.ge დაუკავშირდა საქართველოს საგარეო საქმეთა სამინისტრო მეტი ინფორმაციის მისაღებად. მათ განცხადებას მიღებისთანავე შემოგთავაზებთ.