ზვარეში რკინიგზის მშენებლობისას მუშებზე თავდასხმის ფაქტს გამოეხმაურა შს მინისტრის მოადგილე შალვა ხუციშვილი. მან ჟურნალისტებთან საუბრისას განაცხადა, რომ შესაძლოა გამოძიების მსვლელობისას, საქმე ისევ გადაკვალიფიცირდეს:

"ამ საკითხზე დაკავებულია რამდენიმე პირი. ცემის მუხლით იყო მაგრამ შემდეგ მოხდა გადაკვალიფიცირება ჯანმრთელობის დაზიანების მუხლით. იმის გამო, რომ გარკვეული საგამოძიებო მოქმედებები კიდევ უნდა განხორციელდეს, შეიძლება რაღაც შეიცვალოს. ამ ეტაპზე მთავარია, რომ კონკრეტული პირები არიან დაკავებული".

დღეს, 4 ნოემბერს, ზვარეში რკინიგზის მშენებლობაზე დასაქმებული მუშების მხარდასაჭერი აქცია-მსვლელობა თბილისში გაიმართება. აქცია დაიწყება 5 საათზე ცინცაძის 24-ში, ბრიტიშ პეტროლიუმის ოფისთან, სადაც ნავთობის პროფკავშირი მართავს აქციას, შემდგომ კი ყველანი ერთად მსვლელობით საქართველოს რკინიგზასთან გადაინაცვლებენ.

3 ნოემბერს, ხარაგაულის რაიონის სოფელ ზვარეში, რკინიგზის ლიანდაგის მშენებლობაზე დასაქმებული რამდენიმე მუშა კომპანია ჩინეთის რკინიგზის 23-ე ბიუროს წარმომადგენლებმა სცემეს. დღის ბოლოს, სხეულის განზრახ ნაკლებად მძიმე დაზიანების ბრალდებით, სამი თავდამსხმელი მოქალაქე დააკავეს.