ახალი კორონავირუსის ინფექციის შესაძლო გავრცელების პრევენციასთან დაკავშირებით, თბილისის სახელმწიფო უნივერსიტეტსა და თბილისის სამედიცინო უნივერსიტეტში გაზაფხულის სემესტრი 2 მარტის ნაცვლად, 16 მარტს დაიწყება.

თბილისის სახელმწიფო უნივერსიტეტის განცხადებაში ვკითხულობთ, რომ კორპუსებში ხვალიდან, პირველი მარტიდან სადეზინფექციო სამუშაოები განხორციელდება. მათივე ცნობით, გადაწყვეტილება ეფუძნება დაავადებათა კონტროლისა და საზოგადოებრივი ჯანმრთელობის ეროვნული ცენტრის რეკომენდაციებს.

მანამდე, საჯარო სკოლებთან ერთად, თბილისის საბავშვო ბაგა-ბაღებსა და სახელოვნებო სკოლებში არდადეგები გამოცხადდა 2 მარტიდან 16 მარტის ჩათვლით. არდადეგების თარიღის შეცვლაზე გადაწყვეტილება დღეს, 29 თებერვლის კორონავირუსთან დაკავშირებით შექმნილ უწყებათაშორის საკოორდინაციო საბჭოს სხდომაზე მიიღეს.

საჯარო სკოლებში საგაზაფხულო არდადეგები, 9 მარტის ნაცვლად, 2 მარტიდან დაიწყება და 16 მარტამდე გაგრძელდება. საბჭომ გადაწყვიტა, რომ პროფილაქტიკის მიზნით, სკოლებში ჯანდაცვის სამინისტროს მიერ რეკომენდებული დამატებითი სადეზინფექიო სამუშაოები უნდა ჩატარდეს. უწყებათაშორისი საკოორდინაციო საბჭოს სხდომაზე მიღებული გადაწყვეტილებით, გაძლიერდება სადეზინფექციო სამუშაოები საზოგადოებრივ ტრანსპორტშიც.