სამხრეთ კორეული ფილმის, პარაზიტის პრემიერიდან ერთი წლის შემდეგ ამერიკის შეერთებულ შტატებში რეჟისორ ბონგ ჯუნ ჰოს ჩანახატების მიხედვით გრაფიკული რომანი გამოიცემა.

წიგნს, რომელიც სამხრეთ კორეაში უკვე საკმაოდ პოპულარულია, ინგლისურად გამომცემლობა Grand Central-ი გამოსცემს. მისი მოცულობა 304 გვერდი იქნება და მთლიანად ბონგ ჯუნ ჰოს მიერ შესრულებული ილუსტრაციებით იქნება გაფორმებული, რომლებიც რეჟისორმა ფილმზე მუშაობისას შექმნა.

"წიგნს თანდართული იქნება წინასიტყვაობა, რომელშიც ბონგ ჯუნ ჰო ფილმის გადაღებისა და მთელი შემოქმედებითი პროცესის შესახებ მოგვითხრობს. დიალოგები, ინსცენირება და კამერის მოძრაობის მიმართულებებიც კი მთელი სიზუსტით იქნება ასახული ამ წიგნში", — ამბობენ Grand Central Publishing-ში.

პარაზიტის მსოფლიო პრემიერა გასულ წელს, 21 მაისს კანის კინოფესტივალზე შედგა, სადაც კინოსურათმა ისტორიული გამარჯვება მოიპოვა და პირველი სამხრეთ კორეული ფილმი გახდა, რომელსაც ოქროს პალმის რტო გადაეცა.

გრაფიკული რომანი სწორედ ამ ფაქტიდან ერთი წლის შემდეგ, 19 მაისს გამოიცემა.

"ბონგ ჯუნ ჰოს ილუსტრაციები მისი დრამატურგიისა და რეჟისორობის ბრწყინვალე ოსტატობას უფრო მკაფიოდ გვაჩვენებს. პარაზიტის ეს თვალწარმტაცი გრაფიკული რომანი შესაძლებლობას გვაძლევს კადრს მიღმა შევიხედოთ და წლის საუკეთესო ფილმის შემოქმედებით პროცესს პირადად დავაკვირდეთ", — განაცხადა გამომცემლობის მთავარმა რედაქტორმა, უეს მილერმა.

აღსანიშნავია, რომ პარაზიტის მიხედვით HBO მინისერიალის გადაღებასაც აპირებს, შესაბამისად ამ ფილმის ერთგულ გულშემატკივრებს ბონგ ჯუნ ჰოს სამყაროს უკეთესად შესასწავლად წინ კიდევ ბევრი შესაძლებლობა ელით.

ასევე იხილეთ: