მას შემდეგ, რაც ვარძიაში მომხდარი ხანძრის შედეგად, მრავალსაუკუნოვანი ფრესკები გაიჭვარტლა, დღეს ადგილზე რესტავრატორი ჩავიდა იმისთვის, რომ დაადგინოს, რა ხარისხით დააზიანა ცეცხლმა ისინი. ამის შესახებ On.ge-ს კულტურული მემკვიდრეობის დაცვის ეროვნული სააგენტოს გენერალურმა დირექტორმა, ნიკოლოზ ანთიძემ განუცხადა:

"დღესვე გადაწყდება რა მეთოდით მოხდეს მათი გაწმენდა. სამუშაოები ხვალ დილიდან დაიწყება. დღეს აიგება ხარაჩო, რომელიც უკვე გაგზავნილია. რესტავრატორი ადგენს, თუ რა შემადგენლობით არის ეს ჭვარტლი იქიდან გამომდინარე, რომ არ ვიცით, რა მასალა იწვოდა. ამას კრიმინალისტები ადგენენ. თუმცა, რესტავრატორი მუშაობს იმაზე, რომ ვიცოდეთ რა მასალით და როგორ გავწმინდოთ".

ანთიძემ ასევე განაცხადა, რომ ჯერჯერობით დადგენილი არ არის, რა რაოდენობის მხატვრობაა დაზიანებული მთლიან ტაძარში.

კულტურის სამინისტროს ინფორმაციით, 1 ნოემბერს, გვიან ღამით, ვარძიის ღვთისმშობლის მიძინების ტაძარში ცეცხლი გაჩნდა, რის შედეგადაც ტაძარში მდგარი სასანთლე მაგიდა დაიწვა. აღნიშნულმა უნიკალური მხატვრობის ნაწილობრივ ჭვარტლით დაფარვა გამოიწვია.