წალკის ცენტრში რამდენიმე კვირის წინ ათეულობით ზრდასრული ალვის ხე მოჭრეს. მუნიციპალიტეტის გამგებელი ილია საბაძე On.ge-სთან საუბარში განმარტავს, რომ წალკის ცენტრალურ ქუჩებში და პარკში გაშენებული ხეების “შიგნიდან დამპალი იყო”. მისივე თქმით, გამგეობამ ხეების მოჭრა სპეციალისტების დასკვნის შედეგად გადაწყვიტა.

“ბოლო დროს ქარი იყო და რამდენიმე ხე წაიქცა, კინაღამ ბავშვები მოიყოლა. მოსახლეობამ მოგვმართა განცხადებებით, რომ ეს ხეები მოგვეჭრა. გამოვაცხადეთ ტენდერი, რისი საფუძველიც გვქონდა და რაზეც ხელს აწერენ მეცნიერ სპეციალისტები გიორგი გაგოშიძე, ნატო კობახიძე, ალექსანდრე აფციაური და თენგიზ მეტრეველი. მათ შეამოწმეს ეს ხეები და დაასკვნეს, რომ ექვემდებარებოდა ამოძირკვას”, - განაცხადა ილია საბაძემ.

წალკა

წალკა

ფოტო: პარტიზანული მებაღეობა

გამგებლის თქმით, მარტში წალკის ცენტრში დაახლოებით 40-მდე ხე მოიჭრა.

“50 წლის ხეები იყო, შუალედი ჩამპალი ჰქონდა”, - ამბობს გამგებელი და დასძენს, რომ სამომავლოდ უფრო მეტი ხე დაირგვება: “ტენდერი უკვე გამოვაცხადეთ და იმ ტერიტორიაზე ვაკეთებთ ახალ პარკს”.

ილია საბაძე ასევე განმარტავს, რომ ხეებს ის კომპანია დარგავს, რომელმაც მოჭრა და სპეციალისტებთან ერთად შეარჩევენ დასარგავ ხეებს.

10 აპრილს პარტიზან მებაღეებს სოციალურ ქსელში აცნობეს, რომ წალკის ცენტრში, იქ სადაც სარეკრეაციო ზონა იყო, ხეები მოჭრეს.