რუსთავის საკრებულოს თავმჯდომარე, ლევან ონიანი აცხადებს, რომ მას ელენე ხოშტარიასთვის, როგორც "ქალბატონისთვის" არ უგინებია. მისივე თქმით, ის არ აპირებს, რომ ამის გამო ბოდიში მოიხადოს, რადგან მიუხედავად იმისა, რომ როგორც საჯარო პირს თმენის ვალდებულება აქვს, არსებობს ისეთი ქმედებები, სადაც მისი გინება არის "ყველაზე პატარა ცოდვა" იმასთან შედარებით, რაც "გლობალურად" მოხდა.

ონიანმა მთავარი არხის ჟურნალისტს უთხრა, რომ მის პოსტში, სადაც ის ელენე ხოშტარიასა და მიხეილ სააკაშვილს აგინებს,"შუაშისტებსაც" მოიხსენიებს და მათში, სწორედ ჟურნალისტებს გულისხმობს.

"ელენე ხოშტარიასთვის ლევან ონიანს არ უგინებია როგორც ქალბატონისთვის. ელენე ხოშტარიას ლევან ონიანმა ის ემოციური პოსტი დაუწერა, არა მარტო ელენე ხოშტარიას, მიშა სააკაშვილიც იყო ნახსენები, რომელსაც არანაკლებ ემოციური პოსტი მივუძღვენი. აქედან გამომდინარე ნუ აკეთებთ აქცენტირებას. რატომ არ იქნა იქ აღნიშნული მიხეილ სააკაშვილი, ნახსენები იყო შუაშისტებიც. არ გაგიჩნდათ კითხვა ეს შუაშისტები ვინ არიან? მე გამიჩნდებოდა. მაგალითად, ეს შუაშისტები ხართ თქვენ. ადამიანები, რომლებიც იძახით, რომ ხართ შუაშისტები და არადა ამ დროს ხართ ნაციონალური მოძრაობის პიარ სამსახური", — განუცხადა ონიანმა მთავარ არხს.

პარლამენტში საბჭოთა ჰიმნის ჩართვის გამო რუსთავის საკრებულოს თავმჯდომარემ, ლევან ონიანმა ელენე ხოშტარიასა და მიხეილ სააკაშვილს აგინა. შეურაცხმყოფელი ტექსტი მან ფეისბუქზე საჯაროდ დაწერა, მოგვიანებით კი კიდევ ერთი პოსტით "უცენზურო სიტყვების გამო" საზოგადოებას ბოდიში მოუხადა.

18 თებერვალს პარლამენტის თავმჯდომარის ანგარიშის მოსმენაზე ოპოზიციის ლიდერებმა ელენე ხოშტარიამ და ირმა ნადირაშვილმა საბჭოთა ჰიმნი ჩართეს. სხდომას დიპლომატიური კორპუსიც ესწრებოდა. ოპოზიციონერები მანდატურმა სხდომათა დარბაზიდან მალევე გაიყვანა. პარლამენტის თავმჯდომარე კი ჰიმნის ჩართვას ღიმილით შეხვდა და თანაგუნდელებს ტაშის დაკვრისკენ მოუწოდა, რასაც დეპუტატები აყვნენ. მუსიკის ფონზე ისმოდა პარლამენტის პირველი ვიცე-სპიკერის, გია ვოლსკის ფრაზა: "ნახეთ საწამლავიც არ ჰქონდეთ შემოტანილი სკუნსებს. დატოვეთ თუ შეიძლება დარბაზი".

ევროპული საქართველოს დეპუტატმა, ელენე ხოშტარიამ დარბაზის დატოვების შემდეგ ჟურნალისტებს უთხრა, რომ ისინი მმართველ გუნდს ყოველთვის შეუქმნიან დისკომფორტს.