თიბისის საქმეზე ბრალდებული ავთანდილ წერეთლის ჯანმრთელობის მდგომარეობის გამო დაცვის მხარე სხდომის გადადებას ითხოვს. ადვოკატი დღეს, 10 თებერვლის სხდომაზე, სამედიცინო დოკუმენტაციის საფუძველზე შუამდგომლობის დაყენებას აპირებს.

TV პირველის მფლობელი, ვატო წერეთელი მამის ჯანმრთელობის მდგომარეობის გაუარესებას ყოველდღიურ პროცესებს უკავშირებს:

"ამდენი საათი ყოველდღე სასამართლოში.. გამოიღო შედეგი. ჩვენიადვოკატი დააყენებს შუამდგომლობას, გადადონ პროცესი, თუ არა, მოუწევთ მისი საკაცით ტარება".

6 თებერვალს, საღამოს TV პირველის მფლობელის, ვატო წერეთლის მამა, ავთანდილ წერეთელი საავადმყოფოში გადაიყვანეს. ვატო წერეთლის თქმით, მან მამა სააბაზანოში, უგუნო მდგომარეობაში იპოვა.

"დღეს რომ მოვიდა, მითხრა, უეჭველი მიჭერენო, შემდეგ ამბობდა, ცივი ოფლი მასხამსო, შაქარი გაიზომა და აბაზანაში გავიდა", — თქვა ვატო წერეთელმა ინგა გრიგოლიას გადაცემა რეაქციას პირდაპირ ეთერში.

მანამდე, თბილისის საქალაქო სასამართლოში მოსამართლე გიორგი არევაძე თიბისის საქმეს რამდენიმე საათის განმავლობაში განიხილავდა. ამ საქმეში ერთ-ერთი ბრალდებულია ავთანდილ წერეთელი. წინა სხდომაზე დაცვის მხარემ მოსამართლე არევაძე "მიკერძოებულობაში" დაადანაშაულა. მათი თქმით, მოსამართლე საქმეს "ფორსირებულად განიხილავს", რადგან ახლოვდება არჩევნები.

27 აგვისტოს ფულის გათეთრების ხელშეწყობის საქმეში ავთანდილ წერეთელს აღკვეთი ღონისძიების სახით 500 ათასი ლარის ოდენობის გირაო შეუფარდეს. ავთანდილ წერეთელი ბრალს არ აღიარებს და ამბობს, რომ ფულის გათეთრებას ადგილი არ ჰქონია. სასამართლო პროცესზე მან განაცხადა, რომ მისი ერთადერთი შემოსავალი პენსიაა, ხოლო ოჯახი მცირე შემოსავალს TV პირველიდან იღებს.