ქართული ოცნების დეპუტატი, რევაზ არველაძე კიდევ ერთხელ აყენებს ეჭვქვეშ იმ ფაქტს, რომ საქართველოში ბავშვები შიმშილობენ. მან პარლამენტის სხდომაზე ჯანდაცვის მინისტრს, ეკატერინე ტიკარაძეს ჰკითხა მას გაეცა პასუხი შიმშილობენ თუ არა საქართველოში ბავშვები.

"მე ძალიან კარგად მესმის, რომ საქართველოში არის გაჭირვებული მდგომარეობა, საქართველოში მთავარი პრობლემა სიღარიბეა. აქედან გამომდინარე ასეთ გაჭირვებულ ბავშვებს პრობლემები ექმნებათ როგორც განათლების, ასევე სამედიცინო მომსახურების, სოციალური საკითხების და ა.შ. მაგრამ სულ სხვა საკითხია შიმშილი", — თქვა დეპუტატმა.

რეგლამენტის მიხედვით, მინისტრის პასუხებს დეპუტატები შესვენების დასრულების შემდეგ მოისმენენ.

გუშინ, 4 თებერვალს არველაძემ მთავარ არხთან საუბრის დროს თქვა, რომ საქართველოში ბავშვები არ შიმშილობენ. დეპუტატი, რომელსაც არ სჯერა, რომ ქვეყანაში ყოველი მეხუთე ბავშვი შიმშილობს, რამდენიმე ათეული ათასის ღირებულების ქონებას ფლობს.