ყოველწლიურად Super Bowl-ზე ცნობილი კომპანიები თავიანთი პროდუქტების კრეატიულ რეკლამებს გვთავაზობენ, ამავდროულად კი კინომწარმოებლები მომავალი წლის განმავლობაში დაგეგმილი ყველა მნიშვნელოვანი კინო თუ ტელემოვლენის უახლეს ტრეილერებს გვიზიარებენ, რადგან ეს ის დროა, როცა მილიონობით მაყურებელი ამერიკული საფეხბურთო სეზონის გამარჯვებულის გამოვლენასთან ერთად მოუთმენლად ელის მსგავსი სიახლეების გაგებას.

გამონაკლისი ამ მხრივ წელს არც დისნეი ყოფილა და 30-წამიანი თიზერით Marvel-ის სამყაროს შესახებ გადაღებული სამი ახალი სერიალიდან კადრები გაავრცელა:

Falcon and Winter Soldier, Loki, და WandaVision — დისნეი უახლოეს მომავალში სწორედ ამ სამ სატელევიზიო შოუს შემოგვთავაზებს, მათ შორის Loki-ის პრემიერა 2021 წელს შედგება, დანარჩენ ორს კი წლის ბოლომდე ვიხილავთ.

Falcon and Winter Soldier ამავე სახელებით ცნობილი სუპერგმირების შესახებ მოგვითხრობს, რომელთა როლებსაც ენტონი მაკი და სებასტიან სტენი შეასრულებენ. აღსანიშნავია, რომ შოუს სიუჟეტი 2019 წელს გამოსული Avengers: Endgame-ის შემდეგ განვითარებული მოვლენების შესახებ მოგვითხრობს. მარველის ფილმების მოყვარულებს კი კარგად ახსოვთ, რომ ამ ფილმში კაპიტანმა ამირიკამ სწორედ ენტონი მაკის პერსონაჟს დაუთმო თავისი ტიტული: თიზერში ყველასთვის ცნობილ ფარსაც ვხედავთ.

ფოტო: Disney / Marvel

WandaVision კომიქსის მოყვარულებისთვის ასევე კარგად ნაცნობი პერსონაჟების შესახებ მოგვითხრობს, რომელთა როლებსაც ელიზაბეტ ოლსენი და პოლ ბეთანი ასრულებენ. ამ შოუს სიუჟეტური ხაზიც Avengers: Endgame-ის შემდეგ ვითარდება და ერთგვარად კლასიკური სიტკომების სტილში იქნება გადაღებული — გარეუბანში მცხოვრები ორი სუპერგმირის ცხოვრებას უკეთესად გავიცნობთ.

ფოტო: Disney / Marvel

მართალია, ცოტა უფრო გვიან, მაგრამ მაინც ვიხილავთ მარველის სამყაროს ერთ-ერთი ყველაზე ცნობილი პერსონაჟის, ლოკის შესახებ გადაღებულ სატელევიზიო შოუს, რომლის სცენარის შესახებ ჯერჯერობით ყველაფერი უცნობია, თუმცა ის დანამდვილებით შეგვიძლია ვთქვათ, რომ მთავარ როლს კვლავ ტომ ჰიდლსტონი ასრულებს.

ფოტო: Disney / Marvel

The Mandalorian-ის წარმატების შემდეგ შეგვიძლია თამამად ვივარაუდოთ, რომ დისნეი ამჯერადაც საკმაოდ თამამ, საინტერესო და სანახაობრივ შოუებს შემოგვთავაზებს.