ჩინეთის ქალაქ უხანიდან საქართველოს კიდევ ორი მოქალაქის ევაკუირება საფრანგეთის დახმარებით მიმდინარეობს. ამის შესახებ საგარეო საქმეთა სამინისტროს წარმომადგენელმა ვლადიმერ კონსტანტინიდმა დღეს, 2 თებერვალს, გამართულ ბრიფინგზე განაცხადა.

მისი თქმით, უხანში საქართველოს 3 მოქალაქე საკუთარი გადაწყვეტილებით რჩება.

"სწორად ამ წუთებში დაიწყო დამატებით 2 მოქალაქის ევაკუაცია, რომელსაც ფრანგული მხარე ახორციელებს. ისინი პრაქტიკულად უკვე გამოემგზავრნენ. ისინი განთავსდებიან საფრანგეთში სამედიცინო დაწესებულებაში, გაივლიან შესაბამისი სტანდარტებით საკარანტინო პერიოდს და შემდეგ დაბრუნდებიან საქართველოში. ჩვენი საელჩო საფრანგეთში მონიტორინგს გაუწევს," —განაცხადა ვლადიმერ კონსტანტინიდმა.

მისივე თქით, ჩინეთის ტერიტორიტორიაზე საქართველოს 200-მდე მოქალაქე რჩება, რომლებიც დაავადების გავრცელების ზონაში არ იმყოფებიან. თუმცა, ჩინეთში საქართველოს საელჩოს მათთან კომუნიკაცია აქვს.

უხანიდან ევაკუირებული საქართველოს სამი მოქალაქე თურქეთის სამხედრო თვითმფრინავით ანკარაში ჩაფრინდა.

ჯანდაცვის მსოფლიო ორგანიზაციამ კორონავირუსის გამო საერთაშორისო საგანგებო მდგომარეობა გამოაცხადა. ბრიფინგზე ორგანიზაციის წარმომადგენლებმა განაცხადეს, რომ ვირუსი კვლავ განაგრძობს გავრცელებას, საგანგებო რეჟიმის გამოცხადების მთავარ მიზეზად კი იმ ქვეყნების დაცვა დასახელდა, რომლებიც შეიძლება კორონავირუსთან გამკლავება თავად ვერ შეძლონ.

გაიგეთ მეტი: