თბილისის საკრებულოში ნაციონალური მოძრაობის დეპუტატს, ლევან ხაბეიშვილს, თბილისის საკრებულოს თავმჯდომარის მოადგილის, ირაკლი ზარქუას ცემის საქმეზე ძალადობის მუხლით ბრალი წარუდგინეს. ამის შესახებ შინაგან საქმეთა სამინისტროდან გამოსულმა ლევან ხაბეიშვილმა განაცხადა.

როგორც ხაბეიშვილი ამბობს, ის, რასაც საგამოძიებო უწყება აკეთებს "უხერხულია", რადგან თავს თავად მას დაესხნენ.

"საბრალდებო დასკვნა, როცა ჩამბარდა და გამომაცხადეს, რომ ამ ქართველ ბიჭს, რომ დაერიე და სასტიკად გაუსწორდიო. გამოძიება ამბობს, რომ ე.ი. მე და ზარქუას თურმე ერთნაირი დაზიანებები გვქონია. საზოგადოებამ განსაჯოს რამდენად ნორმალურია, დაგეგმეს პროვოკაცია, დაგეგმეს მოპარვის ლაჩრულად თავდასხმა. შემდეგ ახლა ამბობენ, რომ ხაბეიშვილი დაგვესხა თავსო", — განაცხადა ლევან ხაბეიშვილმა.

დღეს, 31 იანვარს საკრებულოს წევრებს ქართული ოცნებიდან, მათ შორის, ალექსანდრე ხუჯაძეს, ავთანდილ ცინცაძესა და თარაშ შურღაიას ბრალი წაუყენეს. ბრალდება წარდგენილია საქართველოს სისხლის სამართლის კოდექსის 126-ე პირველი პრიმა მუხლის "ბ" ქვეპუნქტით, რაც ჯგუფურ ძალადობას გულისხმობს.

დანაშაული ისჯება ჯარიმით ან საზოგადოებისათვის სასარგებლო შრომით ვადით ას ოთხმოციდან ორას ორმოც საათამდე ანდა თავისუფლების აღკვეთით ვადით ორ წლამდე, იარაღთან დაკავშირებული უფლებების შეზღუდვით ან უამისოდ.

24 იანვრის ბიუროს სხდომის დროს საკრებულოში ნაციონალური მოძრაობის დეპუტატს, ლევან ხაბეიშვილს სცემეს. ინციდენტის კადრებში ჩანს, რომ დეპუტატს ქართული ოცნების რამდენიმე დეპუტატმა სცემა. ხაბეიშვილის თქმით, იგი სატელევიზიო ეთერით კორუფციაზე საუბრის გამო სცემეს.

ინციდენტის შემდეგ ოცნების წევრები მომხდარის გამართლებას იმ არგუმენტით ცდილობდნენ, რომ ხაბეიშვილმა "ეს დაიმსახურა".

გარდა ამისა, მათ გააგრძელეს ხაბეიშვილის დისკრედიტაციაც.

შინაგან საქმეთა სამინისტრომ ლევან ხაბეიშვილის ცემის საქმეზე გამოძიება დაიწყო. საქმე აღიძრა სისხლის სამართლის კოდექსის 126-ე მუხლით, რაც ძალადობას გულისხმობს.