არასამთავრობო ორგანიზაციების განცხადებით, ჯანდაცვის სამინისტროს მიერ სოციალური მუშაკების განთავისუფლების პროცესი დარღვევებით მიმდინარეობს. მათი თქმით, მიუღებელია რეორგანიზაციის საბაბით და ბუნდოვანი დასაბუთებით, კვალიფიციური სოციალური მუშაკების თანამდებობიდან გათავისუფლება.

"სოციალური მუშაობის შესახებ კანონის სამოქმედო გეგმის თანახმად, ჯანდაცვის სამინისტროს 2019 წლისთვის უნდა უზრუნველეყო 50 სოციალური მუშაკის დამატება. თუმცა აღსანიშნავია, რომ ახალი კადრების დამატება თავისთავად გამოწვევას წარმოადგენს, მათ შორის, სოციალური მუშაკის სამუშაოს გადატვირთულობის და შრომის დაბალი სტანდარტების გამო. ამ ყველაფრის ფონზე კიდევ უფრო გაუგებარი ხდება, რატომ დაითხოვეს სამსახურიდან 40-მდე კვალიფიციური და გამოცდილი სოციალური მუშაკი. ასევე, გაურკვეველია რა კრიტერიუმით მოხდა ადამიანების შერჩევა და რა გახდა მათი გათავისუფლების სამართლებრივი საფუძველი", — წერია განცხადებაში.

სოციალურმა მუშაკებმა გათავისუფლებასთან დაკავშირებით შეტყობინება 2019 წლის 29 იანვარს მიიღეს. არასამთავრობოები ეჭვობენ, რომ გათავისუფლებული თანამშრომლები პროტესტის გამო "დაისაჯნენ". მათი თქმით, ისინი მონაწილეობდნენ 2019 წლის თებერვალში კოლექტიურ დავაში, მათი ნაწილი მონაწილეობდა გაფიცვების ორგანიზებასა და საჯარო პროტესტის გამოხატვაში.

ხელმომწერი ორგანიზაციები ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსგან მოითხოვენ:

  • დაასაბუთოს რეორგანიზაციის დროს სოციალური მომსახურების სააგენტოს სოციალური მუშაკების თანამდებობიდან გათავისუფლების საჭიროება და განმარტოს გათავისუფლების კრიტერიუმები;
  • უზრუნველყოს რეორგანიზაციის პროცესის გამჭირვალობა და მასში სოციალური მუშაკებისა და პროფესიული კავშირების ჩართულობა;
  • რეორგანიზაციის პროცესი წარიმართოს 2019 წლის 11 დეკემბრის საკანონმდებლო ცვლილების შესაბამისად და სოციალურ მუშაკთა დანიშვნა სააგენტოში მოხდეს უკონკურსოდ;
  • დაუყოვნებლივ დაიწყოს სოციალური სერვისებისა და სოციალური მუშაობის გადააზრება, შესაბამის კვლევებზე დაყრდნობითა და დარგის სპეციალისტების ჩართულობით დაგეგმოს ამ სფეროს რეფორმისთვის საჭირო ნაბიჯები, მათ შორის ახალი სერვისების შექმნის მიმართულებით;

განცხადებას ხელს აწერენ:

  1. დამოუკიდებელი პროფესიული კავშირი — "სოციალურ მუშაკთა გაერთიანება";
  2. ადამიანის უფლებების სწავლებისა და მონიტორინგის ცენტრი (EMC);
  3. დამოუკიდებელი პროფესიული კავშირი — "სოლიდარობის ქსელი";
  4. დამოუკიდებელი პროფესიული კავშირი — "ერთობა 2013";
  5. საქართველოს ახალგაზრდა იურისტთა ასოციაცია;
  6. ფონდი ღია საზოგადოება საქართველო.