გენერალური პროკურორობის კანდიდატთან გასაუბრება აქციის ფონზე მიმდინარეობს. აქციის მონაწილეების მთავარი მოთხოვნაა, რომ გენერალურ პროკურორად ირაკლი შოთაძე არ დაინიშნოს. ადამიანის უფლებათა ცენტრის ხელმძღვანელი, ალეკო ცქიტიშვილი ამბობს, რომ ყოფილ გენერალურ პროკურორს და ამჟამინდელ კანდიდატს, ირაკლი შოთაძეს ბევრი გაუხსნელი საქმე უკავშირდება.

"მოქალაქეები ითხოვენ სამართალს, მაგრამ ამ სამართალს ვერ მიაღწიეს, სწორედ იმის გამო, რომ ხელისუფლებიდან იყო ბრძანებები, რომ ეს საქმეები არ გამოძიებულიყო", — აცხადებს ცქიტიშვილი.

გენერალური პროკურორობის კანდიდატებთან გასაუბრება დღეს, 27 იანვარს დაიწყო. ამ წუთებში საპროკურორო საბჭო ვიქტორ ახალბედაშვილს ესაუბრება. 15 კანდიდატთან ერთად გენერალური პროკურორობა სურს ირაკლი შოთაძესაც, რომელიც 2018 წელს ხორავას ქუჩის საქმის აქციების გამო გადადგა.

ევროპული საქართველოს დეპუტატი, ოთო კახიძე აცხადებს, რომ "ივანიშვილის პროკურატურაში მორიგი სპექტაკლი იწყება". ის აცხადებს, რომ ირაკლი შოთაძეს კრიტიკულ კითხვებზე პასუხის გაცემა მოუწევს. პარლამენტში იურიდიულ საკითხთა კომიტეტის თავმჯდომარე, ანრი ოხანაშვილი ამბობს, რომ გენერალური პროკურორის შერჩევის პროცედურები გამჭვირვალეა.

გენერალური პროკურორის თანამდებობა ვაკანტური მას შემდეგ გახდა, რაც მოქმედი გენერალური პროკურორი შალვა თადუმაძე უზენაესი სასამართლოს უვადო მოსამართლედ დაინიშნა.

ოპოზიციისა და სამოქალაქო საზოგადოების კრიტიკა გამოიწვია შოთაძის კანდიდატურამ, რომელმაც თანამდებობა 2018 წელს, მას შემდეგ დატოვა, რაც თბილისის საქალაქო სასამართლოს გადაწყვეტილებით ხორავას ქუჩის საქმეზე არასრულწლოვანი დავით სარალიძის მკვლელი ვერ გამოვლინდა და საპროტესტო აქცია დაიწყო. შოთაძის გადადგომას მოკლულის მამა ზაზა სარალიძე და მისი მხარდამჭერები ითხოვდნენ.

პროკურატურიდან წასვლის შემდეგ შოთაძე ტექნიკურ უნივერსიტეტში საერთაშორისო სამართლის ფაკულტეტის მიწვეულ ასოცირებულ პროფესორად მუშაობდა. გარდა ამისა, ის სილქნეტის იურიდიული კონსულტანტი იყო.

არასამთავრობოები მოუწოდებენ საპროკურორო საბჭოს, ირაკლი შოთაძის კანდიდატურას მხარი არ დაუჭირონ.