თბილისის საკრებულოსთან აქტივისტები და ოპოციზიის ლიდერები აქციას მართავენ. ისინი ნაციონალური მოძრაობის წევრის, ლევან ხაბეიშვილის ცემისთვის ქართული ოცნების დეპუტატების დასჯას ითხოვენ.

აქციის მონაწილეების მოთხოვნაა, საკრებულოს თავმჯდომარისგან, გიორგი ტყემალაძისგან მიიღონ პასუხი, თუ რატომ არ ისჯებიან "მოძალადე დეპუტატები". აქტივისტებმა საკრებულოს შენობაზე გააკრეს სტიკერები, რომელზეც გამოსახულია ქართული ოცნების დეპუტატის ფოტო და წარწერა: "მოძალადე ალექსანდრე ხუჯაძე". გავრცელებულ ვიდეოკადრებში ჩანს, თუ როგორ ურტყამს სხდომაზე აღნიშნული დეპუტატი ოპოზიციონერ კოლეგას.

შენობაში შესვლა აქტივისტებთან ერთად სცადეს ნაციონალური მოძრაობის წევრებმა, სალომე სამადაშვილმა და ზაალ უდუმაშვილმა, თუმცა საკრებულოს სამივე შესასვლელში პოლიცია დგას. ისინი მათ ამისამართებენ სხვადასხვა შესასვლელთან, თუმცა იქ მისულ პოლიტიკოსებს პოლიციელები იმავეს ეუბნებიან, რომ სხვა შესასვლელთან მივიდნენ.

24 იანვრის ბიუროს სხდომის დროს საკრებულოში ნაციონალური მოძრაობის დეპუტატს, ლევან ხაბეიშვილს სცემეს. ინციდენტის კადრებში ჩანს, რომ დეპუტატს ქართული ოცნების რამდენიმე დეპუტატმა სცემა. ხაბეიშვილის თქმით, იგი სატელევიზიო ეთერით კორუფციაზე საუბრის გამო სცემეს.

ინციდენტის შემდეგ ოცნების წევრები მომხდარის გამართლებას იმ არგუმენტით ცდილობდნენ, რომ ხაბეიშვილმა "ეს დაიმსახურა".

გარდა ამისა, მათ გააგრძელეს ხაბეიშვილის დისკრედიტაციაც.

შინაგან საქმეთა სამინისტრომ ლევან ხაბეიშვილის ცემის საქმეზე გამოძიება დაიწყო. საქმე აღიძრა სისხლის სამართლის კოდექსის 126-ე მუხლით, რაც ძალადობას გულისხმობს.