დემურ სტურუას დედა ნონა ჯოჯუა On.ge-სთან საუბარში ამბობს, რომ მას ღამღამობით სახლში ყოფნისას უცნობი ადამიანები აშინებენ. მისი თქმით, 5-ჯერ მივიდნენ მის სახლში:

"შუაღამისას, 2-3 საათზე ვიღაც ამოდის, ხმას არ იღებს, აივანზე და იატაკზე ფეხის ხმა ისმის, მიკაკუნებს კარებზე, კარების სახელურს აჭრიალებს, 10 წუთის განმავლობაში ასე გრძელდება. მერე მოვიდნენ და კარი გააღეს ჩემთან, შემოვიდნენ შიგნით, არ ვიყავი სახლში, გადატრიალებული იყო ტანსაცმელი, საწოლები, წაღებული არაფერი არაა. ვიღაცა მიკეთებს განზრახ, განზრახ მამწარებს".

ნონა ჯოჯუას თქმით, გამოძიება მის კითხვებს ვერ პასუხობს. მას აინტერესებს, თუ მისი შვილი თვითმკვლელობამდე გოდერძი თევზაძემ მიიყვანა, რატომ არ დგება მისი გამამტყუნებელი განაჩენი:

"ეჭვები მაქვს. გოდერძი დაკავებულია, თუკი ის მკვლელია, რატომ არ უსჯიან, რატომ წევენ უმიზეზოდ სასამართლოს? სადაა გამოძიება? ვერაფერი ვერ გაარკვიეს".

დემურ სტურუას დედას აქვს ეჭვი, რომ მისი შვილის თვითმკვლელობა გოდერძი თევზაძის გამო არ მომხდარა:

"მე მინდა რომ ნამდვილი მკვლელი დაისაჯოს, იქნებ გარეთ დადის ნამდვილი მკვლელი, შეიძლება ის არის მთლად, რომ მაშინებს, მე არ ვარ დარწმუნებული, რომ გოდერძი მკვლელია.

პირველ რიგში ამას მოვითხოვ, რომ, ჩემი შვილი რომ ხეზე ნახეს ჩამოკიდებული, სანამ თავს მოიკლავდა, წერილი რომ 9-ის 10 წუთზე დაწერა და ღამის 2 საათზე რომ გოდერძი თევზაძემ მოაკითხა და ვერ ნახა სახლში და მეზობლებს რომ კითხა სადააო, ამ ხნის განმავლობაში ჩემი შვილი სად იყო? ვისთან იყო? ეს რატომ არ იყო გამოძიებული?

ჩემი შვილი ჩამოკიდებული რომ ნახეს, საჯავახოს ბიჭებმა, რომლებთანაც ახლობლობდა, წინა დღეებში ჩხუბი მოსვლია და დაურტყიათ ჩემი შვილისთვის, ესენი სად არიან? გამოძიებას ვთხოვე მათი დაკითხვა და რატომ არ გაარკვიეს არაფერი? სუყველა ის ბიჭები აქ საიდან გაჩნდნენ, როცა ჩემი შვილი ნახეს ჩამომხრჩვალი? ამის ეჭვიც მაქვს."

ნონა ჯოჯუა ვარაუდობს, რომ, ის, ვინც მასთან სახლში მიდის, შესაძლოა ის იყოს დაკავშირებული თავისი შვილის თვითმკვლელობასთან:

"ვიღაცა მფარველობს იმას, რომ ასეთი რაღაც კეთდება და აქეთ მიდის გამოძიება. ჩემი შეშინების ფაქტზე მივმართე პოლიციას, სამტრედიის პოლიციას მაინც არ ვენდობი, მარა მათაც დავურეკე, სანამ ისინი მოვიდნენ, ვკიოდი, ჩემი სახლის უკან ტყეა და მათ მოსვლამდე ვინ გაჩერდებოდა?"

დემურ სტურუას დედის თქმით, ის გამუდმებული შიშის ქვეშაა და შინ ძაღლი მიიყვანა:

"ძაღლი მოვიყვანე და სახლის წინ დავაბი და ახლა სახლის უკნიდან დაიწყეს შეშინება.

მე ვფიქრობ, რომ მკვლელი შეიძლება გარეთაა და უნდა ფსიქოლოგიურად ამიყვანოს ჭკუიდან, სისხლის გათეთრება დამემართება ამდენი შიშით, კარები დაკეტილი მაქვს და გარეთ ერ გამოვდივარ შიშით, ან არ შემომივარდნენ, ან არ მომკლან, ან არ დამიკაუნონ, ასეთ შიშში და უბედურებაში ვარ".

შსს-ში On.ge-ს უთხრეს, რომ პოლიციამ ადგილზე სამძებრო სამუშაოები უკვე ჩაატარა, დამატებით ინფორმაციას და პასუხს კითხვაზე, რა ეტაპზეა გამოძიება პროკურატურისგან ველოდებით, რომელსაც მიღებისთანავე შემოგთავაზებთ.

დემურ სტურუას საქმე

აგვისტოს დასაწყისში სამტრედიაში 22 წლის ახალგაზრდამ თავი მოიკლა. თვითმკვლელობამდე დატოვებულ წერილში მან სამტრედიის პოლიციის თანამშრომელი გოდერძი თევზაძე ფიზიკურ და ფსიქოლოგიურ ძალადობაში დაადანაშაულა. საქმეს პროკურატურა იძიებს.

სამსახურებრივი უფლებამოსილების ძალადობით გადამეტებისა და თვითმკვლელობამდე მიყვანის ჩადენაში ბრალდებული, ძებნაში მყოფი, გოდერძი თევზაძე პროკურატურას 13 სექტემბერს ჩაბარდა.

თევზაძე ბრალს არ აღიარებს. მისი ადვოკატი აცხადებს, რომ შესაძლოა დემურ სტურუას თავი არ მოუკლავს და ეს მკვლელობა იყო.