რა ტიპის ინფორმაციის მოძიება შეგიძლია ერთი წუთის განმავლობაში ერთი კონკრეტული ქალაქის შესახებ? დაგეგმილი კულტურული და გასართობი ღონისძიებების შესახებ? საუკეთესო რესტორნების, კაფეების და ბარების შესახებ რეკომენდაციები? კონცერტები და სხვადასხვა სპორტული შეჯიბრებების შესახებ? ახალი ამბების? იქნებ ყველაფრის ერთად?

ან კიდევ, წარმოიდგინეთ ასეთი სიტუაცია: ხართ ქალაქში, რომლის შესახებაც საკმარისი ინფორმაცია მეგობრებისგან არ მოგეპოვებათ, არადა ისეთი ადგილების მონახულება გსურთ, რომლებიც საინტერესო და ჯერ კიდევ აღმოუჩენელია. "გუგლი" თქვენს კითხვებს სტანდარტულად პასუხობს. მაგალითად, გიგდებთ საერთაშორისო ბრენდის სასტუმროებსა და რესტორნებს და აუცილებლად სანახავ ტურისტულად აქტიურ ადგილებს, მაგრამ არაფერს ამბობს იმის შესახებ, სად დადიან ადგილობრივები; რა არის განსაკუთრებული ამ ქალაქში; რა არის ის მთავარი კერძი, რაც აუცილებლად უნდა დააგემოვნო და ა.შ. შეიძლება იგივე კითხვები ფეისბუკზე 5 წუთის წინ დაასტატუსეთ კიდეც, მაგრამ თქვენმა ნაცნობებმა ან არ იციან, ან ვერ ნახეს თქვენი პოსტი. ინტერნეტით კი დიდხანს ვერ ისარგებლებთ. რას იზამდით?

სწორედ ამიტომ შეიქმნა ქართული ტექნოლოგიური სტარტაპი Feedc, რომლის მთავარი გასაღებიც სწორედ ლოკაციაა. ის საშუალებას იძლევა, ერთდროულად აღმოჩნდეთ მსოფლიოს ნებისმიერი ქალაქის, სოფლის ან თუნდაც, უბრალოდ, თავშეყრის ნებისმიერი ადგილის ფიდზე, რაც, თავის მხრივ, უზრუნველყოფს ინფორმაციის ოპერატიულად გადამოწმებისა და ადრესატამდე დროულად მიტანის საშუალებას.

მოხერხებული ინტერფეისით და ჰეშთეგებით თავად ადგენთ თქვენს ნიუსფიდს: გართობა, კვება, ღონისძიებები, საინსტაგრამე ადგილები, ახალი ამბები, პოლიტიკა, ხელოვნება... მოკლედ, ყველაფერი, რაც კი ერთ კონკრეტულ ადგილთანაა დაკავშირებული, თქვენს ხელისგულზეა თავმოყრილი.

აპლიკაციის მეშვეობით, მარტივად შეგიძლიათ, აღმოჩნდეთ მოვლენების ეპიცენტრში; გამოიწეროთ სხვადასხვა თემატიკის ყველა სიახლე; თვალი ადევნოთ პოლიტიკურ და კულტურულ ღონისძიებებს; გაეცნოთ როგორც ტრადიციული მედიის მიერ მოწოდებულ სიახლეებს, ისე თქვენი მეგობრების მიერ დაპოსტილ ამბებს და შეიქმნათ სრული და ამომწურავი სურათი ერთი ლოკაციის გარშემო. მეტიც, თავად გახდეთ მოქალაქე ჟურნალისტი და თქვენივე უნიკალური ხედვით შექმნილი ახალი ამბები გაუზიაროთ აუდიტორიას.

ჰეშთეგებით ინტერესების სფეროს მარტივად გაფილტვრის შედეგად, უკვე იცით, მაგალითად, პარიზში რომელ უბანში მიმდინარეობს რომელიმე კომპანიის გაფიცული თანამშრომლების დემონსტრაცია; რომელ რესტორანში სადილობენ ნამდვილი პარიზელები; რა უნდა ნახო აუცილებლად, ლუვრისა და ეიფელის გარდა, და ა.შ.

მარტივად რომ ვთქვათ, თქვენ ხედავთ ყველა პოსტს, რაც კი კონკრეტულად იმ ადგილიდან დაპოსტილა; შედეგად, ქალაქი ნამდვილად თქვენს ხელისგულზეა გადაშლილი.

Feedc არაა სოციალური ქსელი, ეს არის სოციალური პლატფორმა, რომლის მთავარი მიზანია, შეცვალოს ის, როგორც იყენებენ ადამიანები სოციალურ ქსელებს. Feedc-ს გუნდში ამბობენ, რომ სურთ, დაანგრიონ ყველა ის ბარიერი, რომელსაც ქმნის ყველა სხვა ტრადიციული ახალი ამბების თუ სოციალური ქსელების პლატფორმა. მიზანი კი მარტივია - ყველა ადამიანს ჰქონდეს ინფორმაციის გავრცელების თანაბარი შესაძლებლობა. ამაზე ისიც მეტყველებს, რომ აქ ყველა მოწონება/არმოწონებაც კი ანონიმურია.

ვისთვისაა პლატფორმა განსაკუთრებით საინტერესო?

ყველასთვის, ვისაც ინოვაციური სიახლეები აინტერესებს და ამ ყველაფერს ცხოვრების გასამარტივებლად იყენებს. განსაკუთრებით კი, ახალგაზრდა თაობისთვის, რომლებიც უფრო აქტიურები არიან ონლაინ სივრცეში და აქტიურად მოგზაურობენ საქართველოში და მის ფარგლებს გარეთ. პლატფორმაზე ინფორმაცია თითოეული ლოკაციის შესახებ განუწყვეტლივ ახლდება, რადგან მთავარი პრინციპი ერთი და უნიკალურია - აწარმოოს ახალი ამბები თავად მომხმარებელმა და თავად გახდეს მედიაპლატფორმა.

განუწყვეტლივ იმატებს აპლიკაციის მომხმარებელთა რაოდენობაც. პლატფორმა ნებისმიერი სმარტფონისთვისაა ხელმისაწვდომი. პროდუქტი მუშაობს ანდროიდსა და iOS-ზეც. ძალიან მალე კი ჩაეშვება Feedc-ს ვებვერსიაც.