ბრიტანულმა გამოცემა The Times-მა სულ ცოტა ხნის წინ გაავრცელა ინფორმაცია, რომ სასექსის ჰერცოგინია დისნეის ახალ საქველმოქმედო პროექტში მიიღებს მონაწილეობას.

ჯერჯერობით ახალი პროექტის შესახებ ცნობები გასაიდუმლოებულია, თუმცა, როგორც ცნობილია, მისი მიზანი გარეული ცხოველების დაცვის ხელშეწყობა იქნება და პროექტისგან შემოსული თანხა მთლიანად გადაერიცხება საქველმოქმედო ორგანიზაციას Elephants Without Borders, რომელიც აფრიკაში სპილოებს ბრაკონიერებისგან იცავს.

ამის შესახებ ცნობები მას შემდეგ გავრცელდა, რაც ბუკინგემის სასახლის პრინცმა ჰარიმ და მისმა ცოლმა, მეგან მარკლმა საჯაროდ განაცხადეს, რომ "აპირებენ სამეფო ოჯახის "წოდებით ზემდგომ" წევრობაზე უარი თქვან და იმუშაონ, რათა ფინანსურად დამოუკიდებლები გახდნენ".

როგორც თავად წყვილმა განმარტა, ბრიტანეთის სამეფო ოჯახის თანამედროვე ისტორიის ეს იშვიათი გადაწყვეტილება, რომელმაც დიდი ვნებათაღელვა გამოიწვია, იმითაა განპირობებული, რომ მათ სურთ სახელმწიფო დაფინანსებაზე უარი თქვან, დამოუკიდებლად გამოიმუშაონ ფული და საქველმოქმედო საქმიანობით დაკავდნენ.

როგორც ჩანს, დისნეის ახალი პროექტი, რომელიც, დიდი ალბათობით, ანიმაციური ფილმი იქნება და მეგან მარკლი გამხმოვანებლად მოგვევლინება, სწორედ პირველი ასეთი დამოუკიდებელი სამუშაო გამოცდილება იქნება სასექსის ჰერცოგინიასთვის.