კანადის პრემიერ-მინისტრი ჯასტინ ტრუდო უკრაინული ბოინგის ავიაკატასტროფაში ირანს ადანაშაულებს. ამის შესახებ მან სპეციალურად გამართულ ბრიფინგზე ისაუბრა. ირანში უკრაინული ავიახაზების თვითმფრინავის კატასტროფის შედეგად 177 ადამიანი დაიღუპა, მათგან 63 კანადის მოქალაქე იყო.

"არაერთი წყაროდან გვაქვს მტკიცებულებები, რომ თვითმფრინავი ირანულმა რაკეტამ ჩამოაგდო. დიდად სავარაუდოა, რომ ეს შეცდომით იყო გაკეთებული", — განაცხადა ტრუდომ.

პრემიერი ამბობს, რომ ბოინგის კატასტროფასთან დაკავშირებით კანადელებს აქვთ კითხვები და ისინი პასუხებს ითხოვენ.

ტრუდოს შემდეგ ირანის დანაშაულზე ისაუბრა დიდი ბრიტანეთის პრემიერ-მინისტრმა, ბორის ჯონსონმა.

"არსებობს მთელი რიგი ინფორმაცია, რომ თვითმფრინავი ირანულმა რაკეტამ ჩამოაგდო. სავარაუდოდ, ეს მიზანმიმართული არ იყო", — აღნიშნა ჯონსონმა.

საერთაშორისო მედია პენტაგონისა და სადაზვერვო სამსახურების წყაროებზე დაყრდნობით წერდა, რომ უკრაინული ავიალაინერი შეცდომით ირანულმა რაკეტამ ჩამოაგდო. ამასთანავე, The New York Times-მა გაავრცელა ვიდეო, რომლითაც ირწმუნება, რომ ბოინგი რაკეტის შეჯახების შედეგად ჩამოვარდა.

8 იანვარს ირანში, თეირანის აეროპორტთან უკრაინის საერთაშორისო ავიახაზების თვითმფრინავი ჩამოვარდა და ბორტზე მყოფი ყველა პირი, 168 მგზავრი და 9 ეკიპაჟის წევრი, გარდაიცვალა. დაღუპულთა შორის 7 ქვეყნის მოქალაქეები არიან. მათ შორის ირანის — 82, კანადის — 63, უკრაინის — 11, შვეიცარიის — 10, ავღანეთის — 4, გერმანიის — 3 და დიდი ბრიტანეთის — 3 მოქალაქე. უკრაინის 11 მოქალაქეს შორის 2 მგზავრი იყო, 9 კი ეკიპაჟს წევრი.

კომპანიის წარმომადგენლები აცხადებენ, რომ თვითმფრინავი აფრენიდან თითქმის 2 წუთში რადარებიდან გაქრა. მათივე თქმით, მომხდარის გამო გაურკვეველი დროით ირანში ფრენებს შეწყვეტენ.

კომპანიის ტექნიკური დირექტორის განცხადებით, ბოინგი 2016 წელს გამოშვებულია და ბოლო ტექნიკური შემოწმება 6 იანვარს გაიარა. მისი თქმით, შემოწმებისას პერსონალს არანაირი ტექნიკური ხარვეზი არ აღმოუჩენია და არც ეკიპაჟს უცნობებია რაიმე სახის პრობლემაზე. მისივე თქმით, ეს ბოინგი ერთ-ერთი საუკეთესო იყო მათ შორის, რაც კომპანიას გააჩნდა.

ირანი უარს ამბობს შავი ყუთი უკრაინას გადასცეს, თუმცა დათანხმდა იმას, რომ გამოძიებაში უკრაინელმა ექსპერტებიც ჩაერთონ.