ევროპული საქართველოს დეპუტატის, ზურაბ ჭიაბერაშვილის განცხადებით, დღეს მთავრობამ აღიარა, რომ ანაკლიის პორტის მშენებლობის შეჩერება რუსეთის არგაღიზიანების პოლიტიკის ნაწილია. ასე გამოეხმაურა ის ქართული ოცნების დეპუტატ რომან კაკულიას, რომელმაც კონსორციუმთან ხელშეკრულების შეწყვეტა "რუსული პოლიტიკის თავიდან აცილებით" ახსნა.

"ხაჭაპურის დაცხობა, ხინკლის მოხვევა, რუსი ტურისტისთვის ტაშ-ფანდური — აი, ესაა, ის მაქსიმუმი, რაც შეიძლება ქართველმა აკეთოს.

P.S. არაფერი მაქვს საწინააღმდეგო არც ხაჭაპურის, არც ხინკლის, არც ტურიზმის, მაგრამ მხოლოდ ამით ფეხზე ვერ სავდგებით და ვერ გავმდიდრდებით", — წერს დეპუტატი ფეისბუქგვერდზე.

რაც შეეხება რომან კაკულიას, მან განაცხადა, რომ მთავრობა ხაზარაძემს იმიტომ "დაეტაკა", რომ მან ვერ გააკეთა სწორი არჩევანი საგარეო კურსზე.

"მე გეუბნებით, ამ ნარატივში, რომ ბიძინა ივანიშილი არის თუ არა რუსული პროექტი, თუ მისი დამოკიდებულება რუსეთის მიმართ არის ქვეყნის უსაფრთხოებიდან გამომდინარე, მე ვდგავარ იმ მხარეს, ეს არის რუსული პოლიტიკის თავიდან აცილების პოლიტიკა", — თქვა რომან კაკულიამ.

საქართველოს მთავრობამ ღრმაწყლოვანი პორტის მშენებლობასთან დაკავშირებით ანაკლიის კონსორციუმთან ხელშეკრულების შეწყვიტის შესახებ დღეს, 9 იანვარს განაცხადა. მინისტრის თქმით, კონსორციუმმა ვერ შეძლო ხელშეკრულებით ნაკისრი ვალდებულებების შესრულება. რაც შეეხება ხელშეკრულების გაწყვეტასა და პირგასამტეხლოს, ცქიტიშვილი ამბობს, რომ ისინი ხელშეკრულების მიერ გაწერილ პროცედურებს მიჰყვებიან.

ანაკლიის განვითარების კონსორციუმმა და სახელმწიფომ პროექტზე ერთობლივი მუშაობა 2016 წელს დაიწყეს. პროექტის მიხედვით, სამუშაოების სრულად დასრულების შემდეგ, ის პორტი 3 000 ჰექტარზე მეტ ფართობზე უნდა გაშლილიყო და 32 ნავმისადგომი უნდა ჰქონოდა.

ბოლო ორი წლის განმავლობაში მთავრობამ კონსორციუმის ვალდებულებების შესრულება არაერთხელ გადაუვადა. ისინი კონსორციუმს ვალდებულებების შეუსრულებდლობაში ადანაშაულებდნენ მაშინ, როცა კონსორციუმი, პირიქით, მთავრობას ადანაშაულებდა ხელშეშლაში.

კონსორციუმში შემავალი თიბისი ჰოლდინგის მაშინდელი ხელმძღვანელი და ახლა მოძრაობა ლელოს ლიდერი, მამუკა ხაზარაძე აცხადებდა, რომ მთავრობა ანაკლიის პორტის მშენებლობას მიზანმიმართულად უშლის ხელს.