ქართული ოცნების დამფუძნებლისა და თავმჯდომარის, ბიძინა ივანიშვილის შვილი, ბერა ივანიშვილი წერს, რომ მისი ფიქრები და ლოცვა ავსტრალიის ხანძრისკენაა მიმართული. ამ თემასთან დაკავშირებით მან პოსტი ინსტაგრამზე გამოაქვეყნა.

"ამჟამად ვეძებ დახმარების გზებს, თუ როგორ ჩავერთო პროცესში. იქამდე კი მოდით გავზარდოთ ცნობიერება, გააზიარეთ ეს პოსტი თქვენს სთორიში. ავსტრალიის ხანძრების შედეგად დაიწვა 12 მილიონი აკრი, რაც უფრო მეტია, ვიდრე ერთად აღებული კალიფორნიის, ამაზონისა და ციმბირის ხანძრების მიერ დამწვარი ტერიტორია. კლიმატის ცვლილება რეალურია", — წერს ბერა ივანიშვილი.

ეს პირველი შემთხვევა არაა, როცა ბერა ივანიშვილი კლიმატის პრობლემების გადასაჭრელად პროცესში ერთვება. რამდენიმე თვის წინ მან ამაზონში გაჩენილი ხანძრის გამო ჯუნგლების დასახმარებლად 1,1 მილიონი დოლარი გადარიცხა. ბერა ივანიშვილის ამ გადაწყვეტილებას საზოგადოებაში კრიტიკა მოჰყვა. მაშინ მას მმართველი გუნდის წევრები გამოესარჩლნენ.

ავსტრალიაში ბოლო ათწლეულების განმავლობაში ერთ-ერთი ყველაზე მასშტაბური ხანძარი მძვინვარებს. ხანძრების შედეგად მინიმუმ 24 ადამიანი გარდაიცვალა და 1 300 სახლი დაიწვა. ხანძრებმა სამხრეთ უელსის რეგიონში მცხოვრები კოალების მესამედი გაანადგურა.

ხანძართან ბრძოლაში მეხანძრეების გარდა ჩართულია რამდენიმე ათასი მოხალისეც, ისევე როგორც სამხედროები. დასახმარებლად მეხანძრეები ავსტრალიაში კანადამ და ამერიკის შეერთებულმა შტატებმაც გაგზავნა.