მსოფლიო მშვიდობის კეთილი ნების ელჩი, ლაპლანდიელი სანტა ენგურის ხიდზე, საოკუპაციო ხაზთან ჩავიდა

ლაპლანდიელი სანტა, რომელიც მსოფლიოს მშვიდობის კეთილი ნების ელჩია დღეს, პირველ იანვარს საოკუპაციო ხაზთან, ენგურის ხიდზე ჩავიდა. სამეგრელო-ზემო სვანეთის რწმუნებულის პრესსამსახურის ინფორმაციით, სანტამ ოკუპაცია დაგმო და საქართველოს ერთიანობასა და მშვიდობაზე ისაუბრა.

"ჩვენ ვიმყოფებით ძალიან განსაკუთრებულ ადგილას, დღეს ეს ხიდი ჯერ კიდევ ყოფს ოკუპირებულ აფხაზეთს და თავისუფალ საქართველოს, მსოფლიოში ჩემი მთავარი დანიშნულება არის ვიყო ელჩი მშვიდობის და სიკეთის! მე ვიცი, რომ ახლო მომავალში ეს საზღვარი არ იარსებებს და ვისურვებ, რომ მოვიდე შემდეგ წელს ამ ხიდთან და აღვნიშნოთ ამ საზღვრის არქონა, ეს სურვილი საუკეთესო იქნება ქართველებისთვის და მსოფლიოსთვის. ახლა დროა ქართველი ხალხის და თავისუფალი საქართველოსი, მიყვარხართ გისურვებთ წარმატებებს!" — განაცხადა სანტამ ენგურის ხიდზე.

სანტამ ახალი წელი სოფელ რუხში მცხოვრებ ბავშვებს მიულოცა, მოგვიანებით კი საჩუქრები ზუგდიდში დევნილ ბავშვებს დაურიგა.

მშვიდობის ელჩი ზუგდიდის შემდეგ ფოთს ეწვევა. ხვალ 2 იანვარს კი მესტიაში გაემგზავრება. სანტა საქართველოში 9 იანვრამდე დარჩება, ამ ხნის განმავლობაში კი ქვეყნის სხვადასხვა რეგიონს და დედაქალაქს ესტუმრება.