იღბლიან მზარეულზე მოგიყვებით, რომელიც წარმოშობით ლატვიიდან არის, მაგრამ უკვე 9 წელია, რაც დიდ ბრიტანეთში ცხოვრობს.

საქმე ის არის, რომ 36 წლის დიზის ოჯახის სარჩენად კვირაში 60 საათი უწევდა მუშაობა, თუმცა, სულ რამდენიმე დღის წინ ძალიან გაუმართლა და ლატარიაში მილიონი გირვანქა სტერლინგი მოიგო.

მიუხედავად იმისა, რომ იღბლიანმა ბილეთმა კაცის ცხოვრება რადიკალურად შეცვალა, მან საკუთარი მოვალეობა პირნათლად შეასრულა და შობას მაინც იმუშავა.

ფოტო: PA MEDIA

"ამ შობას ჩემი საუკეთესო სურვილი ამისრულდა", — ამბობს ლატვიელი მზარეული და იმასაც ამატებს, რომ ამიერიდან მიეცემა შესაძლებლობა, საკუთარ შვილებს გაცილებით მეტი დრო დაუთმოს.

იმაში დასარწმუნებლად, რომ ნამდვილად მოიგო მილიონი, ციფრების გადამოწმება, ჯერ უფროსთან, შემდეგ კი ეროვნული ლატარიის ცხელ ხაზზე სცადა. გარანტირებული მილიონით კი 4-საძინებლიანი ბინა და საკუთარი შვილისთვის უამრავი საშობაო საჩუქარი შეიძინა.

"ყველაზე მეტად ჩემი შვილისთვის უზრუნველი მომავლის შექმნა მინდოდა და ამ გამარჯვებით, მე ეს შევძელი", — ამბობს დიზი.