#სირცხვილიას აქტივისტები შოთა დიღმელაშვილი და ჯაბა ზარქუა სიტყვის თავისუფლების ხელშეწყობისთვის დააჯილდოვეს. სპეციალური ჯილდო მათ საქართველოს წიგნის გამომცემელთა და გამავრცელებელთა ასოციაციის მიერ ორგანიზებულ წიგნის საახალწლო ფესტივალზე გადასცეს.

ფესტივალზე ყოველწლიურად მწერლები და მთარგმნელები სხვადასხვა კატეგორიაში ჯილდოვდებიან. ჯილდო საქართველოში სიტყვისა და გამოხატვის თავისუფლების განმტკიცებაში შეტანილი წვლილისათვის წელს პირველად დაწესდა და მიზნად ისახავდა გამოევლინა ადამიანები ლიტერატურული სფეროდან, რომლებიც 2019 წელს განსაკუთრებით გამოირჩეოდნენ იმ აქტივობებით, რომლებიც სიტყვის თავისუფლების გაძლიერებას უწყობდა ხელს.

"ლიტერატურა მთელი თავისი არსით სიტყვისა და გამოხატვის თავისუფლებაზეა დაფუძნებული. ამიტომ, წელს გადავწყვიტეთ ამ თვალსაზრისითაც შევაჯამოთ გასული წელი, მივუძღვნათ არაერთი ღონისძიება სიტყვის თავისუფლების თემას, ამ გზით გამოვეხმაუროთ ქვეყანაში მიმდინარე აქტუალურ მოვლენებს და მადლობა ვუთხრათ იმ ქართველ მწერლებს, რომელთაც ამ კუთხით განსაკუთრებული წვლილი მიუძღვით", — განაცხადა საქართველოს წიგნის გამომცემელთა და გამავრცელებელთა ასოციაციის თავმჯდომარე გვანცა ჯობავამ.

მოძრაობა #სირცხვილია 2019 წლის 20 ივნისის მოვლენების შემდეგ შეიქმნა, როდესაც საქართველოს პარლამენტის თავმჯდომარის სკამში რუსი კომუნისტი დეპუტატი გავრილოვი ჩაჯდა, ანტიოკუპაციური მიტინგი კი სპეცრაზმმა დაშალა. აქტივისტები მთელი ზაფხულის მართავდნენ აქციებს, რომლებზეც აპროტესტებდნენ 20 ივნისს მომხდარს, ითხოვდნენ შს მინისტრის გადადგომასა და პროპორციული საარჩევნო სისტემას. მას შემდეგ, რაც ქართულმა ოცნებამ პროპორციული საარჩევნოს სისტემის კანონპროექტი ჩააგდო #სირცხვილიას პროტესტი გაგრძელდა.