შიდა ქართლში, ატენის ხეობაში, სოფელ ორმოცის მიმდებარედ ხანძრის ქრობის სამუშაოებში შინაგან საქმეთა სამინისტროს სასაზღვრო პოლიციის ვერტმფრენი ჩაერთო. როგორც On.ge-ს საგანგებო სიტუაციების მართვის სამსახურში განუცხადეს, ხანძრის ჩაქრობას, თავდაცვის სამინისტროს სახანძრო ტექნიკასთან ერთად, 200 მეხანძრე-მაშველი ცდილობს.

მათივე ინფორმაციით, ამ დროისათვის დაკვამლიანება 10 ჰექტარზეა გავრცელებული. ჯერჯერობით უცნობია, რა ფართობის ქვედა საფარია დამწვარი, მას მოგვიანებით დაადგენენ. ცეცხლის გავრცელების არეალის მონიტორინგი დრონის საშუალებით მიმდინარეობს.

ადგილზე შექმნილია სამუშაო შტაბი, რომელსაც შინაგან საქმეთა მინისტრის მოადგილე იოსებ ჭელიძე და საგანგებო სიტუაციების მართვის სამსახურის უფროსი თემურ მღებრიშვილი ხელმძღვანელობენ. ასევე, ადგილზე იმყოფება სახანძრო-სამაშველო ძალების დეპარტამენტის უფროსი დავით სუხიშვილი.