ტელეკომპანია კავკასია ფინანსთა სამინისტროს მიმართავს, რომ გაასაჯაროვოს ინფორმაცია იმაზე, თუ რა ეტაპზეა ტელეკომპანიების: იმედის, რუსთავი 2–ის და მაესტროს მრავალმილიონიანი დავალიანებების საკითხის განხილვა. ამის შესახებ კავკასია განცხადებას ავრცელებს.

როგორც კავკასიის განცხადებაში ვკითხულობთ, თუ იმედი, რუსთავი 2 და მაესტრო თავიანთ დავალიანებას დაფარავენ, კავკასია მზადაა, იმავე დღეს დაფაროს მიმდინარე დავალიანება.

"მოვითხოვთ, ჩაგვაყენოთ ყველა დანარჩენი ტელეკომპანია თანაბარ მდგომარეობაშია და არათუ დღეისთვის არსებული დავალიანებები გადაგვინაწილოთ გადახდის იგივე გრაფიკით, არამედ ამ არხების დავალიანების თანხის პროპორციული (ყოველი ცალკეული არხის შემოსავლებთან მიმართებაში, ან დავალიანების დაგროვების პერიოდის გათვალისწინებით) მოცულობის ბიუჯეტში გადახდილი თანხები დაგვიბრუნოთ უკან და მოგვცეთ საშუალება ბიუჯეტს ეს თანხები გადავუხადოთ იმავე გრაფიკით, როგორც ზემოთჩამოთვლილი ტელეკომპანები დაფარავენ ძველ დავალიანებას", — ნათქვამია კავკასიის განცხადებაში.

დღეს, 23 დეკემბერს ფინანსთა სამინისტრომ განცხადება გაავრცელა და ბიუჯეტის დავალიანების მქონე ტელევიზიებს ერთდღიან ვადა მისცა, რათა 2019 წლის პირველი ოქტომბრიდან დაგროვილი მიმდინარე დავალიანების ძირი თანხა დაფარონ.

როგორც ცნობილია, 2019 წლის აგვისტოს მონაცმებით, ბიუჯეტის დავალიანება სამ ტელეკომპანიას აქვს: რუსთავი2–ს — 28 მილიონი ლარი, იმედს — 19 მილიონი ლარი, მაესტროს — 8 მილონი ლარი. თუმცა, ფინანსთა სამინისტროს არ გაუსაჯაროებია ინფორმაცია, რა ეტაპზეა მოლაპარაკება ამ არხებთან და როგორ აპირებს სახელმწიფო მათი დავალიანების ამოღებას.