რუსთავი 2-ის ინფორმაციით, კრწანისის საწვრთნელ ბაზაზე მოკლული გიგა შენგელიას ოჯახის წევრები აცხადებენ, რომ გარდაცვლილის ძმა, გიორგი შენგელია აღნიშნულ ბაზაზე 15 ოქტომბრამდე სავალდებულო სამხედრო სამსახურს იხდიდა და შესაძლოა, ბაზაზე შეჭრილი პირები, მათ შორის გიგა შენგელია, მეგობრის სანახავად მისულიყვნენ ბაზაზე.

გარდაცვლილის ოჯახის წევრები შენგელიას მხრიდან კრწანისის ბაზაზე თავდასხმის ფაქტს გამორიცხავენ და ასევე ამბობენ, რომ გამორიცხულია, შენგელიას იარაღი ჰქონოდა. ამ დროისთვის მოკლული, გიგა შენგელია ზუგდიდში, თავის სახლშია გადასვენებული.

23 ოქტომბერს წვრთნებისა და სამხედრო განათლების მხარდამჭერ ცენტრ კრწანისში უცხო პირები შეიჭრნენ. სამინისტროს განცხადებით, შეჭრის შემდეგ მიმდებარე ტერიტორიაზე ერთ-ერთი თავდამსხმელის გვამი აღმოაჩინეს. სწორედ აღნიშული პირია გიგა შენგელია. გიორგი შენგელიას ადგილმდებარეობა ამ დროისთვის უცნობია.