უზენაესის მოსამართლეების დამტკიცების მეორე დღეს, მძაფრი სუნის მიზეზით, პარლამენტში ქიმიური წმენდა ჩატარდა. ინფორმაციას ამის შესახებ პარლამენტის პრესსამსახური ავრცელებს.

მიუხედავად იმისა, რომ პარლამენტმა სუნის გაშვებიდან 3 საათში მოსამართლეები დაამტკიცა, დღეს ამ მიზეზით "მინისტრის საათი" გადაიდო. მინისტრის საათის ფარგლებში ნათია თურნავას მოსმენა იგეგმებოდა. პლენარული სესია დღეს, 13 დეკემბერს 15:12 საათზე შეწყდა.

"ჯერჯერობით დაუდგენელი ქიმიური ნივთიერების გამოყენების შემდეგ პლენარული სხდომის მიმდინარეობისას დღესაც შეუძლოდ გახდა რამდენიმე ადამიანი, რის გამოც სხდომის გაგრძელება დღის მეორე ნახევარში აღარ მოხდება... სასესიო დარბაზი დამატებით დამუშავდება სხდომების განახლებამდე", — წერია პარლამენტის პრესსამსახურის განცხადებაში.

12 დეკემბერს პარლამენტში პლენარული სხდომა სპეციფიური სუნის გავრცელების გამო შეწყდა. ადგილზე გამოიძახეს საპატრულო პოლიცია და სასწრაფო დახმარება. მომხდარზე პასუხისმგებლობა მოძრაობა #სირცხვილიამ აიღო. თუმცა, უმრავლესობის დეპუტატები ამბობენ, რომ სხდომათა დარბაზში სპეციფიური სუნის მქონე ნივთიერება ევროპული საქართველოს დეპუტატებმა: ირმა ნადირაშილმა და ლელა ქებურიამ შეიტანეს.