განმუხურის 38–ე საარჩევნო უბანზე, სადაც საპარლამენტო არჩევნების განმეორებითი კენჭისყრა იმართება, დილიდან იმყოფებიან ქართული ოცნების ოზურგეთის მაჟორიტარი დეპუტატობის კანდიდატი არჩილ თალაკვაძე და ამავე პარტიის საპარლამენტო სიის წევრი კახა კუჭავა. ინფორმაციას ამის შესახებ ლაივპრესი ავრცელებს.

„დამკვირვებლები და სამართალდამცავები არიან უბანზე. დარწმუნებული ვართ არჩევნების განმეორებითი ნაწილი ჩატარდება მშვიდ და კონკურენტულ გარემოში. ჩვენი ამოცანაა დემოკრატიული არჩევნების მონაპოვარი გამოვიყენოთ ქვეყნის განვითარებისთვის“, - განაცხადა არჩილ თალაკვაძემ.

8 ოქტომბერს, ხმის დათვლის დროს, სოფელ ჯიხაშკარის 66-ე ოლქის 79-ე და 108-ე საარჩევნო უბნებზე გაურკვეველი პირები შეიჭრნენ და დაარბიეს, ხოლო განმუხურის 38–ე უბანზე დაფიქსირდა მნიშვნელოვანი დარღვევები, რის გამოც არჩევნები იქაც ჩაიშალა.

ზუგდიდის სამი უბნის გარდა, 8 ოქტომბერს ასევე თავს დაესხნენ მარნეულის 48–ე უბანს, სადაც პოლიციას ქვები დაუშინეს. კენჭისყრის შედეგები აქაც გაუქმდა და ხელახალი არჩევნები დაინიშნა.