ამერიკის შეერთებული შტატების სენატმა ერთხმად მიიღო რეზოლუცია სომეხთა გენოციდის შესახებ. როგორც გამოცემა USA Today წერს, ეს არის ისტორიული გადაწყვეტილება, რომელიც გაამძაფრებს აშშ-თურქეთის ურთიერთობას.

Reuters-ის ცნობით, თურქეთი აღიარებს, რომ ოსმალეთის იმპერიაში მცხოვრები სომხები პირველი მსოფლიო ომის დროს, ოტომანის ძალებთან შეტაკებისას დაიღუპნენ. თურქეთი უარყოფს, რომ მკვლელობები იყო სისტემატიური და ორგანიზიბული გენოციდის სახით.

1915 წლის 24 აპრილს სტამბულში სომხეთის ინტელიგენციის 800 წარმომადგენელი ჯერ დააპატიმრეს, შემდეგ კი დახოცეს. ამის შემდეგ დაიწყო ეთნიკური სომხების მასობრივი მკვლელობები და დეპორტაცია, რის შედეგადაც მილიონნახევარი ადამიანი დაიღუპა.

სომეხთა გენოციდის ფაქტი პირველმა ოფიციალურად 1965 წელს აღიარა ურუგვაიმ, მას შემდეგ, აღიარებას კიდევ 21 ქვეყანა შეუერთდა, მათ შორის, საფრანგეთი, გერმანია, იტალია, რუსეთი და კანადა.

2009 წელს, სომეხთა გენოციდი ასევე აღიარეს ავსტრალიამ და შვედეთმა. თურქეთი და თურქული ისტორიოგრაფია ოსმალეთის იმპერიაში სომხური მოსახლეობის მიზანმიმართული განადგურების ფაქტს დღემდე კატეგორიულად უარყოფს.

სომხეთი აგრძელებს მსოფლიოს ქვეყნებისადმი მოწოდებას, რომ 1915 წლის მოვლენები გენოციდად აღიარონ.