აზერბაიჯანის სასაზღვრო სამსახურის განცხადებით, 6 დეკემბერს მესაზღვრეებმა აზერბაიჯანის ტერიტორიაზე მწყემსის გადაადგილება შენიშნეს. მათივე ცნობით, ცხვრის ფარის გადარეკვისას მესაზღვრეებს თავს დაესხა მწყემსის 10-მდე ძაღლი, რომელთაც გამაფრთხილებელი ცეცხლი გაუხსნეს.

აზერბაიჯანის საზღვრის დაცვის სამსახურის ცნობითვე, ერთ-ერთმა მესაზღვრემ დაშავებული მწყემსი შენიშნა და პირველადი დახმარება აღმოუჩინა. იგი უახლოეს სამედიცინო დაწესებულებაში გადაიყვანეს. ამ დროისთვის მწყემსის ჯანმრთელობის მდგომარეობა დამაკმაყოფილებელია.

სასაზღვრო სამსახური აცხადებს, რომ უკვე ცნობილია პირის იდენტობაც — 1993 წელს დაბადებული ბაშიროვ რამინ ნაზიმი, საგარეჯოს რაიონის სოფელ ლამბალის მკვიდრი და საქართველოს მოქალაქეა.

10 დეკემბერს მთავარმა არხმა გაავრცელა ინფორმაცია, რომ აზერბაიჯანელმა მესაზღვრეებმა, საქართველოს საზღვარზე, დავით გარეჯის მიმდებარე ტერიტორიაზე მწყემსი დაჭრეს. არხი აცხადებს, რომ მწყემს, დაახლოებით, 10 ტყვია ესროლეს.